Дека Груевски сѐ уште ги влече конците во својата партија е вчерашна вест и нема што да се расправа околу тоа. Вчерашна вест е и фактот дека општеството и институциите на државата сѐ уште се под силна окупација на претходната режимска банда, почнувајќи од правосудството, завршувајќи со јавните претпријатија, инвеститори, изведувачи и подизведувачи по сите ќошиња на системот, и оние што имаат смисла и оние што имаат апсурдни (дис)функции.
Вемерото е коалиционен партнер во власта на различни начини, дури и формално – преку својот огранок наречен ДУИ. И лесно му е на ова Груево вемеро, недопрено од Сваровски судството, да продава стари финти и да ја тресе владата како што ќе му се присака.
Добро се сеќаваме како несмасната, но не помалку манипулантската, декларација на партиите кои се претставуваат како албански, успешно ја спинуваа вемеровските агитпроп солдати со операцијата Тирана (Тиранска платформа). Па се изнедрија секакви креатури со разни корки на грпките, за на крај да извршат крвав напад врз Собранието на 27 април. Вемеренцето, неослабено (напротив), подготвува нов 27 април. Во иста или друга форма како и првиот обид да посеат терор и деструкција.
Во меѓувреме, Заев и неговиот тим, за половина година, успеа да надомести сѐ што изгубивме на регионален и меѓународен план за време на 11-годишното владеење на диктаторчето. Тоа беше толкав успех, што ни „гафовите“ од типот„лична проценка“ за солидарност со Косово што ја направи Бујар Османи, не го поматија тој успех.
На домашното политичко боиште (тоа и е!), владата на Заев , едноставно, нема шанси да спроведе коренити реформи, имајќи го вемеровското ДУИ на плеќите, а ни корумпираните користољупци од редовите на неговата партија.
Врв на лицемерството и злокобната манипулација е најновиот „подарок“ на Грујовата марионета Мицкоски. Тој му нуди на Заев поддршка за реформите, доколку тој се откаже од Законот за јазици. Звучи познато, нели? Пред само една година, Груевски го нудеше истото – Заев да се откаже од „Тиранската платформа“, за да го откочи процесот на формирање влада. Што се случи? Терор!
А можат ли Мицкоски и Ахмети (неформалните коалициони партнери) да се договорат и да го притиснат Заев и неговата влада да ги спроведе сите закони кои се однесуваат на употребата на јазикот од нивното време?! Бидејќи, ТИЕ беа на власт цела деценија и си носеа секакви закони, па и онакви што ја регулираат оваа област. Притоа, нека покажат доблест и нека побараат одложување на процесот за донесување на сегашната верзија на законот за јазици, бидејќи и онака е преполна со фалинки. И сите да се посветат на тоа за кое велат дека се согласни: реформи, ЕУ интеграција и членство во НАТО. Македонците, Албанците, Ромите, Турците, Србите, Бошњаците и сите спомнати и неспомнати во Уставот, па и сите што не се дел од „народите и народностите“ на Македонија, гласаа за слобода, демократија и владеење на правото, а не за од по жица, дворски игри и опасни врски!
На прво место да ги стават реформите на Сваровски судството! Да ги ослободат невините! Да ги стопираат апсурдните пресуди против невладините организации и активистите! Да ги стават зад решетки виновните за дивеењето и грабежот! Да ги конфискуваат украдените пари (дисплејот, нели, да проработи)! Да ги раскинат штетните договори и да ги истражат милионските тендери! Да ги осудат гангстерите кои напаѓаат жени (во униформа) и се закануваат на новинари! Да ги осудат оние што купуваат гаќички за 500 евра од притаен данок. Да ги отпуштат од работа мафиозите во судството и да ги осудат!
Ако Заев не крене рачна и не им врзе машна на гангстерите, тие нему ќе му врзат омча. Што и да му ветат, нема да го исполнат. Толку барем знаеме.
*
ПС. Многу извичници во овој текст… Имаше и зошто!
Услови за користење, авторски права и заштита на приватноста
Преземање на содржините под различни услови од наведените не е дозволено, освен со писмена дозвола од ЦИВИЛ.
