Секакво спомнување за минимум регулација на онлајн медиумите и порталите наидува на страшен отпор од ЗНМ и „експертите“ за медиуми, бидејќи на тој начин ќе се загрозела слободата на новинарството.
Да појасниме за јавноста што е, всушност, заложбата: Порталите не треба ниту да се регистрираат, бидејќи тоа бил опасен удар врз слободата на новинарството. Тоа значи да не бидат регистрирани како медиуми и да немаат обврска ниту да објават импресум (кој е главен уредник, кој работи во редакцијата). Сѐ што ќе објават да не може да подлежи на демант, ниту на тужба за клевета, бидејќи не се медиум.
Моите искуства во граѓански парници се дека судиите воопшто не земаат предвид што е напишано на портал, затоа што тоа не е медиум. Се залагаат да можат слободно да објавуваат лажни вести, дезинформации, да шират говор на омраза (статистички, над 80% од говорот на омраза се генерира на порталите), да можат да крадат вести, да си прават копи-пејст на вести и на цели емисии, или да си земаат од телевизиските емисии тоа што им треба, често пати од тоа да извадат бомбастична вест надвор од контекст и да не треба да прашаат дали воопшто може да се послужат со туѓо авторско право, за да не им ја загрозиме слободата. Никој да не смее да пропише да имаат лектор, минимум технички стандарди, елементарна висина на студио, ако сакаат да глумат онлајн телевизија… 95% од нив лиферуваат купишта видеа, а немаат камери и сниматели… да не треба да плаќаат дури ни индустриска струја.
Од друга страна, телевизиите мора да имаат најмалку 100 вработени, студија по пропис, да плаќаат индустриска струја, даноци, ДДВ, да плаќаат скапи авторски права, а на кабелските оператори слободно да оди пиратски контент. На секоја емисија да објавуваат импресум и ако ја пропуштат таа обврска еднаш од 20 пати во денот добиваат казна, да има закон за АВМУ од над 100 страници со најдетални подробности што смеат, а што не, а притоа во Агенцијата за медиуми не смее да има луѓе од телевизиите, бидејќи било конфликт на интереси, туку луѓе од портали или евентуално весници, кои не работеле во телевизија и не ја разбираат работата…
Телевизиите мора да имаат балансирано известување со закана од драконски казни, а прилозите мораат да ги мерат на штоперица, за секоја објавена вест да им виси тужба, не смеат да земаат реклама од буџетски средства во било каква форма, па дури и ако емитуваат политичка пропаганда во комерцијално време, и тоа мора да биде балансирано. Скапиот контент кабелските оператори им го пренесуваат бесплатно, а тие за тоа да си наплаќаат.
Има уште многу апсурди, 20 страници не ме расправаат. Тоа е идејата за фер ситуација на пазарот на медиуми. За вакво статус-кво ЗНМ лобира кај странските амбасадори. Фер, нема што.
(објавено со согласност од Авторот)
Услови за користење, авторски права и заштита на приватноста
Преземање на содржините под различни услови од наведените не е дозволено, освен со писмена дозвола од ЦИВИЛ. Повредата на авторските права е забранета со закон.
