„Овој Договор е во согласност со националните интереси на Македонија. Овој голем чекор како што наведовме и во Договорот, одговара на интересите на народите на Македонија и Бугарија. Договорот е одраз на новиот дух на политики, од генерација политичари на денешнината што градат мостови, а не уриваат, коишто подаваат раце за да ги сплотат граѓаните, а не вртат грб за да ги делат“, рече премиерот Зоран Заев на денешната прес-конференција, на којашто беше претставен Договорот за пријателство, добрососедство и соработка со Република Бугарија.
Документот беше изгласан на синоќешната седница на Владата, при што е донесена одлука, премиерот Заев да го потпише Договорот за пријателство, добрососедство и соработка со соседна Бугарија.
„Договорот го усогласивме, зашто и од другата страна имаме пријател и сосед со добра волја, за да затвориме прашања што непотребно одвлекуваат внимание и енергија, наместо да ги насочуваат кон интересите на двете земји и нивните народи“, потенцираше премиерот Заев.
Тој посочи дека Договорот целосно ќе придонесе кон подобрување на политичката, економската и културната соработка меѓу двете земји, а ќе придонесе кон што побрза интеграција на Македонија, кон НАТО и ЕУ.
На прашање на ЦИВИЛ Медиа, дали со Договорот за соработка, добрососедство и пријателство со Бугарија, ќе се стопира масовната појава на добивање бугарски пасоши, при што граѓан(к)ите на Македонија, се декларираат како Бугари, што пак, влијае врз демографската структура и одливот, пред сè, на младите лица, премиерот Заев, со одговор:
Договорот, како што рече премиерот, ќе биде потпишан на 1 август во Владата на Република Македонија. Договорот ќе биде јавно објавен на Интернет страницата на Владата и секој заинтересиран ќе може да го прочита.
Моника Талеска
Камера: Дехран Муратов
Монтажа: Ермин Климента
