„Конечно и кај нас дојде правдата после три години. Малку доцнеше, но тоа е. Успеавме. Се изборивме. Невин човек се судеше. Што друго да се рече?“, изјави Бранко Петровски, сопственикот на менувачницата „Бис“ откако во петокот доби ослободителна пресуда, за случај во кој е невин и за кој е докажано во претходна судска постапка.
Ослободителната пресуда доаѓа како резултат покренатиот случај против Петровски, од тужителот Спиро Чорогунов, за истото дело, за кое Чорогунов доби условна казна од 3 години за тешки телесни повреди.
Имено на 18 мај 2019 година околу 13 часот Чорогунов го нападнал Петровски пред неговата менувачница со тупаници, го кутнал на земја и продолжил силно да го удира во пределот на лицето и главата. Првично беа утврдени две фрактури, на горната вилица и на носот, но денеска, при контрола, се утврдила уште една сериозна фрактура во пределот на главата. Петровски од нападот се здобил со две фрактури, на горната вилица и на носот и уште една сериозна фрактура во пределот на главата. Поради повреди Петровски останува хоспитализиран 14 дена.
Со оглед дека случајот е заведен како нанесување тешки телесни повреди, ретко кога се изрекува мерка притвор, туку случајот МВР го процесуира со обвинение и судска постапка. Првата реакција е на Обвинителството со покренување на кривична пријава, по што следува и судската постапка. Иако доказите укажуваа и беа на страна на Петровски, Чорогунов успева казната од една година затвор да ја замени со три години условна казна, период во кој не смее да изврши ниту едно кривично дело.
Чорогунов како слободен, условно, човек, продолжува да го води бизнисот и со хотелите „Александар Сквер“ и „Александар 2“ во центарот на Скопје и градежната фирма „Караорман“. Тоа не му е доволно па решава да покрене приватна тужба, за истиот случај, за кој е обвинет и за кој пред судот изразил жалење, овој пат како оштетена страна. Односно, со обвинение дека Петровски него му нанел телесни повреди во пределот на вратот, а во доказната постапка, меѓу другите, повикувајќи се и на докази кои веќе на негова штета беа приложени во првичното судење.
Како што објасни и синот на Петровски, актерот Стефан Петровски и сопственик на кафулето „Гарсон“, со лекарско уверение извадено, две години подоцна, Чорогунов, се обиде пред судот да покаже дека тој е оштетената страна.
Иако, Петровски и семејството, не се задоволни од првичната казна, иако претрпеа дополнително психолошко малтретирање од уште една година докажување на невиноста, која е повеќе од очигледна од самиот почеток, тие се надеваат дека оваа голгота конечно заврши.
ЦИВИЛ –Центар за слобода го мониторираше овој случај и ќе продолжи да ги следи состојбите, доколку постои причина за понатамошно следење.
ЦИВИЛ останува на ставот дека не требаше да се дозволи приватната тужба, која е неоснована и се базира на претходно завршена судска псотапка, судски да се процесуира.
Во таа насока ЦИВИЛ се придружува на пораката на Стефан Петровски, ова да биде опомена, дека правдата не треба да биде спора и изнемоштена, туку напротив, силна и издржана и да ја врати довербата кај граѓаните.
„Никому да не му се случи и никогаш да не се повтори, нема нешто повредно од мирот!“, вели Стефан, по примањето на веста за ослободителната пресуда на неговиот, невин, татко.
Б. Ј.
