Колку луѓе ќе умрат денеска поради грдото лице на институциите? Колку луѓе ќе бидат на работ на плачот, онеправдани и понижени, гневни. Додека узурпаторот врши увид врз промашените проекти кои нему му донесоа милионски провизии, некои родители ќе бараат хуманитарна помош за да го спасат животот на своето дете.
Секојдневно, системот предизвикува по некоја трагедија. Институциите сè уште се само една обична алатка во рацете на партијата која не успеа ни со терористички акт да ја задржи формалната власт, но грчевито го блокира враќањето на демократијата и владеењето на правото. Главните соучесници, судството и полицијата функционираат според мрачни и криминални концепти, се однесуваат гротескно, мрачно, грдо и налудничаво. И имаат директно влијание врз животот на луѓето, секојдневно, често со трагични последици. Со вистински, опипливи, трагични последици!
Додека партиската војска врши притисок врз системот, уценува и глуми патриотизам, разбојништвото продолжува. Сончогледите веќе се свртени кон сонцето, но старите инструкции сè уште им се во внатрешните џебови. Земјата талка во мракот, по крвавите напади и терор кој го организираа и спроведоа луѓе со име и презиме. Но, само дел од криминалците добиваат симболични казни, а најодговорните продолжуваат по својот неславен пат. За тоа време, невини луѓе лежат в затвор. Умираат таму, ги фрлаат на бетонот во затворските дворови. Невини!
Направија лавиринт од закони кои функционираат само за притисок и заплашување, односно нивната солдатеска да живее подобро, ако е послушна и да мине низ пекол, ако не е. Всушност, не постојат вистински институции, не постои вистинско спроведување закони, туку само алатки на криминална структура. Да му се згади на човек, колку можат да бидат подли и злобни.
Волјата на граѓанките и граѓаните е скршена и манипулирана. Децата ги воспитуваат морално распаднати партиски шрафчиња. Како питбули, чии вилици се вкочанети на вратот на жртвата, ја држат власта, влијанието, моќта… Вгнездени се во секоја пора на државниот апарат, медиумите и општеството, ги згмечија семејствата и ги претворија во запчаници на послушничката машинерија. Живот меѓу стапот и морковот!