ТЕМА НА ДЕНОТ
Аболиција, амнестија, претседателска функција: Каде е разликата меѓу Иванов и Пендаровски?
Речиси целиот втор мандат на местото шеф на државата Иванов го мина во создавање на конфликти и злоупотреби на функцијата во одбраната на власта на Груевски. Аболицијата му беше едно од инструментите во таа насока. Нема ни трошка од тие методи во мандатот на Пендаровски, но тој постојано е мета на напад со лажни наративи…
ИЗЈАВА НА ДЕНОТ
Хан: Северна Македонија е на одличен пат кон ЕУ, партиските интереси да се стават на страна
Северна Македонија денес е на одличен пат кон ЕУ. Но, би сакал да пренесам порака до сите политички сили во земјата – соработувајте. Ова е тимска задача, треба да играте како национален фудбалски тим, а не како шампионат на поединци. Треба заедно да работите, инаку нема да бидете успешни, порача денеска еврокомесарот за буџет Јоханес Хан.
ВОЈНА ВО УКРАИНА
Во последните недели, Украина нагло го забрза темпото на напади во и околу привремено окупираниот полуостров Крим, кој стана критичен центар за руската војска. Украинската војска тврди дека погодила рускиот систем за ракетна одбрана земја-воздух на Крим и два руски воени бродови во Црно море…
*
Руската пропаганда често го користи еврејското прашање за да внесе раздор и да ги подели Украинците и Евреите. Тоа го прави главно со паразитирање на историски прашања или со воздигнување на разни помали инциденти до универзални размери (често со нивно фабрикување)…
ФЛЕШ ВЕСТИ
ОДБРАНА Министерката за одбрана, Славјанка Петровска престојува во работна посета на САД, каде ќе се сретне со високи официјални претставници на Пентагон и на Стејт Департментот, соопшти Министерството за одбрана.
СЛУЧАЈ ОНКОЛОГИЈА За случувањата во Клиниката за онкологија, важно е предметот да се заврши брзо и квалитетно, а пардон нема да има за никого, истакна министерот за внатрешни работи Оливер Спасовски во интервјуто за неделникот „Фокус“.
УСТАВНИ ИЗМЕНИ Премиерот Димитар Ковачевски денеска изјави дека на гласањето во Парламентот не гледа како на гласање за амандмани на Уставот, туку како на гласање за продолжување на европската интеграција во земјата.
СКОПСКИ ЕКОНОМСКИ ФОРУМ Третиот Скопски економски и финансиски форум (СЕФФ) почнува денеска, а темата е „Европа – ДА, Европа – СЕГА“. Форумот ќе го отворат премиерот Димитар Ковачевски, министерот за финансии Фатмир Бесими и еврокомесарот за буџет Јоханес Хан.
КОВИД ВАКЦИНА Европската комисија денеска одобри употреба на адаптираната вакцина против корона вирусот „Спајквакс Икс-Бе-Бе.1.5“ („Spikevax XBB.1.5“) за есенските кампањи за вакцинација во земјите членки на ЕУ.
АЛ-ПРЕС
Редакциски избор на ЦИВИЛ Медиа од албанските медиуми во регионот – На вчерашната средба на косовскиот премиер Курти и српскиот претседател Вучиќ во Брисел, на која посредник беше Жозеп Борел, не се постигна напредок во дијалогот. Курти бара признавање на Косово од страна на Србија, за веднаш потоа, без задршки, да почнат со реализирање на договорот во кој меѓу другото, се бара формирање Заедници со српско мнозинство. Жозеп Борел повика на итни избори на северот на Косово, за да се превенираат евентуални кризи.
ЦИВИЛНИ АКТИВНОСТИ
На денешен ден, пред 16 години светот започна да го одбележува Меѓународниот ден на демократијата, 15 септември. Овој ден се одбележува секоја година низ светот за да се зајакне демократијата и да се истакнат нејзините вредности и принципи.
Темата на Меѓународниот ден на демократијата оваа година е „Зајакнување на следната генерација“. ОН се фокусира на суштинската улога на младите во унапредувањето на демократијата и обезбедувањето дека нивните гласови се вклучени во одлуките кои имаат големо влијание врз нивниот свет. Климатска правда и демократија се дел од таа тема. Ефектите од климатската криза врз животната средина денес е невозможно да се игнорираат, а станува сè поочигледно дека тоа е предизвик за демократијата: растечката несигурност на храна, миграцијата, недостигот на вода и екстремните временски настани предизвикуваат конфликти и им тежат како проблеми на гласачите.
АНАЛИЗА
Кинеската централна банка побара од некои од најголемите кредитори во земјата да се воздржат од итно квадратирање на нивните девизни позиции на пазарот и да имаат отворени позиции некое време со цел да се ублажи надолниот притисок врз јуанот. Како дел од овие неформални „насоки за прозорци“, од банките е побарано да не ги средуваат своите позиции на меѓубанкарските девизни пазари по секоја продажба во американски долари на клиентите, додека нивната девизна позиција не достигне одредено ниво, пишува Драган Мишев во анализата „Кина бара од големите банки да ги приспособат купувањата во долари за да го ублажи надолниот тренд на јуанот„
МРЕЖА
Вицепремиерот за европски прашања Бојан Маричиќ по повод 15 септември – Меѓународниот ден на демократијата посочува дека овој ден потсетува дека демократијата, владеењето на правото и почитувањето на човековите права се во основата на отпорните, инклузивни и сигурни општества, општества на граѓани на кои им е загарантирана слободата и достоинството, како и прогресот и одржливиот развој на нивната заедница. Маричиќ на објава на неговиот профил на Фејсбук потенцира дека Меѓународниот ден на демократијата истовремено е и повод да опстоиме во потрагата по демократски одговори на заканите во време на тензии и превирања.
СТАВОВИ
Во нашава јавност сѐ повеќе се етаблира нова параспортска дисциплина. Некако успеваме да придонесеме кон светската палета на бесмислени натпревари и рекорди. Новата дисциплина е издржливост во следење на дебатните емисии на нашите медиуми и тоа во сите електронски модификации. Врв на издржливоста е следење на сите такви медиумски продукти во вечерните термини, а за оние љубители на екстремноста постојат ноќни интернет можности за следење на разни поткасти и „надкасти“, пишува Војо Маневски во колумната „Стрес-тест на македонски начин“
Д. Мишев
