Екстремисти од неколку ултрадесничарски и проруски организации во Србија планираат насилни протести во деновите по денешната средба на српскиот претседател Александар Вучиќ и косовскиот премеир Албин Курти со посредниците од ЕУ, Жозеп Борел и Мирослав Лајчак во Охрид.
Според неименувани извори на „Блиц“, екстремистички групи го чекаат исходот од охридската средба и се надеваат на „потпишување на нешто“, односно парафирање на некаков обврзувачки договор меѓу Белград и Приштина, што би го сфатиле како доказ за наводното „предавство“ на Косово и причина за улични протести со насилство.
Повеќе илјада припадници на српски десничарски партии и движења синоќа се собраа на протест пред Храмот „Св. Сава“ во Белград, од каде се упатија кон Кабиентот на претседателот Алексадар Вучиќ. Протестот насловен „Србија памети, брани, не дава“, го организираа движењето Двери, Нова ДСС, ПОКС и Заветници, против, како што најавија, прифаќањето на европскиот план за нормализација на односите со Косово.
Демонстрантите носеа повеќеметарското знаме на Србија и запалени факели и скандираа „Косово, Србија“ и „Косово, не го даваме“.
Протестот претставуваше, како што наведоа организаторите, „надпартиско патриотско обединување“ на сите кои се против договорот на ЕУ за нормализација на односите меѓу Косово и Србија. Насобраните имаа три барања – да се отфрли европскиот план за нормализација на односите меѓу Белград и Приштина, Вучиќ да поднесе оставка и веднаш да се распишат избори.
Вучиќ претходно демантираше каков било потпис. Тој рече дека „во Охрид нема да има никаков судбински ден“.
Ништо не сум потпишал, ниту ќе потпишам нешто. Кога некој ќе потпише нешто, ќе потпишам јас, а не планирам да потпишам нешто, имајте го тоа на ум, изјави Вучиќ.
Г. Т.
