ВЕСТ НА ДЕНОТ
Министерство за култура: Почна процесот на исплата на платите со покачување од 10 отсто, во март ќе има ново усогласување на минималната плата
Министерството за култура информира дека е почнат процесот на исплата на платите во културата со покачување од 10 проценти, постапувајќи по Општиот колективен договор во јавниот сектор и по Заклучокот на Владата од 26 септември, со кој се задолжуваат државните органи да ја зголемат основната бруто-плата за 10 проценти.
ИЗЈАВА НА ДЕНОТ
Дерала за ТВ Шења: Северна Македонија е пример како функционира пропагандата, Србија шири руска пропаганда низ целиот регион
Во емисијата „Интервју на Шења“, новинарот и претседател на невладината организација „Цивил“, Џабир Дерала, рече дека Северна Македонија е пример за тоа како функционира пропагандата.
„Ние сме пример. Со тоа што имајте предвид дека, ние сме само спунтот од она што се случува во Србија“, рече Дерала.
ВОЈНА ВО УКРАИНА
Украинскиот претседател Володимир Зеленски во средата се појави во седиштето на НАТО, во момент кога нова војна доминира на насловите и го спореди го Путин со терористите на Хамас
Додека фокусот на светската јавност последниве денови е сврен кон случувањата на блискиот исток и војната помеѓу Израел и Хамас, во Украина со несмалена жестина продолжуваат руските гранатирања врз цивилни цели.
ФЛЕШ ВЕСТИ
ЕВРОИНТЕГРАЦИИ Европскиот комесар за проширување Оливер Вархеји денеска изјави дека лидерите на Европската унија многу јасно ја потврдиле перспективата за членство на Западен Балкан и повикаа на забрзување на процесот на проширување.
ДАНОЧНА ПОЛИТИКА Луксузните возила и оние кои испуштаат поголем процент на јаглероден диоксид во воздухот ќе имаат повисока даночна стапка, изјави денеска вицепремиерот за економски прашања Фатмир Битиќи.
ГАРАНТИРАНИ ЦЕНИ Министерот за економија Крешник Бектеши денеска повтори дека производите наведени во Одлуката за „гарантирана цена“ нема да бидат опфатени со предвиденото зголемување на данокот на додадена вредност (ДДВ). Доколку има какви било технички грешки, рече Бектеши, ќе се корегираат.
УСТАВНИ ИЗМЕНИ Министерот за надворешни работи Бујар Османи е оптимист и очекува уставните амандмани, кои се услов за продолжување на пристапните преговори со ЕУ, а на кои, вели, се работи во моментов, да бидат донесени, и целиот процес успешно да заврши.
ОБСЕ Во игра се повеќе сценарија за тоа кој ќе биде следниот претседавач со ОБСЕ за наредната 2024 година, по завршувањето на мандатот на Северна Македонија, а едно од нив е нашиот мандат да биде продолжат за уште една година, вели шефот на дипломатијата и претседавач на Организацијата Бујар Османи.
БЛИСКИОТ ИСТОК Израелскиот премиер Бенјамин Нетанјаху и Бени Ганц, лидер на опозициската партија Национално единство, во средата постигнаа договор за формирање влада на единство. Двајцата лидери рекоа дека новата влада ќе ги следи само нацрт-законите или владините одлуки во врска со конфликтот, што го предизвика Израел да испрати воени сили во Појасот Газа и да мобилизира голем број резервисти пред офанзивата против терористичките групи на Хамас.
ГОВОР НА ОМРАЗА Европската комисија ја заврши дискусијата во рамките на Групата на високо ниво за борба против говорот на омраза и кривичните дела мотивирани од омраза, со цел надградба и усогласување на Кодексот на однесување за справување со омразата и нетолеранција со одредбите од Законот за дигитални услуги на ЕУ.
ЗЕЛЕНИ Во рамки на програмата „Хоризонт Европа“, Европската Унија денеска на десет градови во земјите членки на ЕУ им ја додели титулата „климатски неутрални и паметни градови“.
АЛ-ПРЕС
Неколку часа пред Собранието да одржи специјална седница за Косово, постигнат е договор меѓу СП и ПД за заедничка нацрт-резолуција. Албанија ќе биде членка на Советот за човекови права за периодот од 1 јануари 2024 година до 31 декември 2026 година. Косовскиот премиер Албин Курти рано во четвртокот изјави дека постои зголемен ризик од повторени насилни напади од „криминалните структури на Србија на Косово“, пишуваат албанските медиуми. Ова се само дел од темите од редакцискиот избор на ЦИВИЛ Медиа, од албанските медиуми во регионот, за денешното издание на АЛ-ПРЕС.
ЦИВИЛНИ АКТИВНОСТИ
МУЛТИКУЛТУРА
Како што кажа и градоначалникот, не значи дека Ромите се тие што треба да ги ставиме на тапет и да зборуваме за лошите особини. Сакам да кажам дека луѓето се делат на луѓе и не-луѓе. Луѓе што почитуваат, и луѓе што не почитуваат. Луѓе што имаат потреба од помош, и луѓе кои треба да дадат помош. Ако одиме по пристапот на Обединетите нации, луѓето се делат на две категории, едните се приматели на права, другите се даватели, односно, тие што треба да обезбедат основни услови за живот, посочи Мустафа Саидов, активист од Кочани, на јавниот настан „Граѓански дијалози за меѓуетничките односи: Предизвици и решенија“.
ЗЕЛЕНИ
„Единиците на локалната самоуправа согласно законската регулатива што ја носиме имаат многу обврски што треба да ги спроведуваат, ама соработката мора да биде и на централно и на локално ниво. Во сферата на управување со отпад општините имаат обврска за управување со отпад, ама ако погледнете на централно ниво, по региони, ние сѐ уште немаме конкретна ни финална реализација на регионална депонија“, истакна заменик министерката за животна средина, Христина Оџаклиеска, на панелот на ЦИВИЛ на тема „Македонската зелена агенда: Реалност или тешко остварлива цел?“.
АНАЛИЗА
Доколку се обрне внимание на содржините кои дел од македонските медиуми ги објавуваат на своите канали за информирање, може да се добие впечаток дека Северна Македонија, во најмала рака е членка на Руската федерација, а не на НАТО и претендент за идна членка на ЕУ.
Секое појавување на Путин во јавноста, вклучително и неговите изјави, кои скоро секогаш се на штета на евроатлантските интеграции, се пренесува некритички, во дел од нив и со нескриено воодушевување, без да се изрази било каков сомнеж во нивната вистинитост, а за проверка и спротивставување на ставовите воопшто не доаѓа предвид. Ова секако потсетува на информирањето во бившата СФРЈ, кога со воодушевување се пренесуваше секое појавување во јавноста, било дома или при посетата во страство на тогашнот ( доживотен) претседател, Јосип Броз-Тито. Очигледно, овие медиуми, рускиот диктатор го доживуваат како свој претседател, пишува Драган Мишев во анализата „ Македонските медиуми и руската пропаганда: Путин кивна, НАЗДРАВЉОТ!“
СЛОБОДНА ЗОНА
БЕЗ ФИЛТЕР
Многу ретко читам коментари на социјалните мрежи. Всушност, тоа не се коментари, туку се исечоци од претходно креирани ставови и предрасуди (и тоа во најдобар случај) или се чисто тролање. Голем број од коментарите се простачки, вулгарни и насилни. Што е најтрагично – не значат ништо и немаат врска со содржината која се коментира. Со еден збор – глупост.
Многу е смешно кога ќе објавите текст или видео за чие читање или гледање се потребни повеќе од една минута, а реакциите стигнуваат веќе во првите 10-15 секунди, а често и во првите пет секунди. Имаше еден период кога на секое наше видео на Јутуб, само што ќе го објавиме, се појавуваше dislike (не ми се допаѓа). Тоа беше многу забавно, да се види колку се ревносни троловите задолжени да нè напаѓаат. Несомнено, оваа ситуација е уште поочигледна на социјалните мрежи Фејсбук и Твитер (Екс), пишува Џабир Дерала во колумната „ШОКАНТНО! Прочитајте што има под насловот“
Подготви: Д. Мишев
