Според последниот извештај на ОН за Албанија, институциите со најмалку доверба се политичките партии и парламентот, како и судовите и обвинителствата, пренесоа албанските медиуми.
Европската унија (ЕУ) ќе го поддржи Косово со 75 милиони евра како дел од енергетскиот пакет, во рамки на Планот за раст, пишуваат косовските медиуми.
Во продолжение се поместени содржините од денешниот редакциски избор на ЦИВИЛ Медиа, од албанските медиуми во регионот, за денешното издание на АЛ- ПРЕС.
АЛБАНИЈА
ТОП ЧАНЕЛ – Извештај на ОН: Зголемена довербата во реформираната правда, партиите последни на списокот
Последниот извештај на Обединетите нации во Албанија за довербата во управувањето, од крајот на 2023 година со околу 2500 испитаници, покажува преглед на перцепцијата на јавноста во државните институции, транспарентноста, отчетноста и граѓанската вклученост.
Податоците покажуваат дека институциите со најмалку доверба се политичките партии и парламентот, како и судовите и обвинителствата. Но, реформираниот правосуден систем се чини ја доби довербата на Албанците, кои сметаат дека придонесува за позитивен развој на земјата. Главно СПАК, бележи пораст од 10% врз основа на податоците од 2022 година, пренесува Топ Чанел.
Факс Веб – БИЛД: Албанија, центар на европската мафија на трговија со кокаин, банди поврзани и со политиката во земјата
Германскиот весник БИЛД ги расветли мрежите и наркокартелите кои ја снабдуваат Германија и цела Европа со кокаин. На насловната страница весникот објавува текст со наслов: „Албанија, нарко-државата пред нашата врата“. Германските истражители и американските власти предупредија дека оваа земја е центар на европската мафија на кокаин.
Сојузната министерка за внатрешни работи Ненси Фезер, исто така, го предупреди BILD дека албанските банди го преплавуваат германскиот нарко пазар. БИЛД во написот пишува дека мафијашките убиства одамна се дел од секојдневието во Албанија, каде само во 2021 година се забележани 100 вакви убиства. Шефовите на мафијашкиот клан и дилерите на кокаин исто така имаат одлични врски во полицијата, пренесува Факс Веб.
КОСОВО
РТВ 21: ЕУ ќе го поддржи Косово со 75 милиони евра
Европската унија (ЕУ) ќе го поддржи Косово со 75 милиони евра како дел од енергетскиот пакет. Ова го соопшти шефот на Канцеларијата на Европската унија во Косово, Томас Сунјог.
Како што соопшти Сзуњог преку социјалната мрежа „Х“, на средбата било констатирано дека Планот за раст дава дополнителен поттик за забрзани реформи и обезбедува финансиски средства за важни проекти, пренесе РТВ 21.
ДВ: „Генерација 99“: Младите од Косово и Србија во Куманово
Како младите од Косово и Србија, родени за време на војната во 1999 година, ја гледаат иднината на овие земји? На иницијатива на ДВ се сретнаа во Куманово каде беше потпишан Договорот со кој заврши војната, пренесе Дојче Веле.
КОЛУМНА
Коха: Зошто ЕУ претпочита статус кво во дијалогот?
Потребно е искрено и отворено да се зборува за одговорноста на ЕУ во досегашниот неуспех на дијалогот меѓу Косово и Србија. Повеќе од интерес за постигнување целосна нормализација, ЕУ докажа дека претпочита статус кво.
Освен повторените барања до Косово „што е можно поскоро“ или „без натамошно одлагање“ за формирање на Заедницата на општините со српско мнозинство, ЕУ не брза за ништо друго освен за дијалог. И на овој начин дојдовме до чудната ситуација кога еврото се смета за „притисок за етничко чистење“, додека барањата за отворање мост како „еднострана акција што води кон дестабилизација на ситуацијата“, пишува авторот Аугустин Палокај во колумната “Зошто ЕУ претпочита статус кво во дијалогот?, објавена во Коха.
Подготви: Д. Тахири
