Сé поголем број на граѓан(к)и сметаат дека главна причина зошто Македонија сé уште не е дел од Европската унија, е неостварувањето на домашните реформи. Истовремено, се намалува процентот на оние кои сметаат дека причина за застојот во евроинтеграциите се соседните држави кои го попречуваат влезот на Македонија во ЕУ. Ова го покажуваат податоците од „Анализата на јавното мислење на македонскиот процес на пристапување кон Европската унија (2014-216)“, подготвена од Институтот за демократија „Социетас Цивилис“ од Скопје.
Анализата е лонгитудинална и ги споредува податоците добиени од истражувањето спроведено во септември 2014-та, со тие од ноември 2016-та година. Податоците покажуваат и дека се зголемува бројот на граѓани кои сметаат дека Македонија не е подготвена за влез во ЕУ.
Поддршката за членство во Европската унија бележи тренд на опаѓање, од 80% во 2014-та, на 77% во 2016-та година.
„Сепак, поддршката продолжува да биде голема, и падот од 3% е очекуван со оглед на стагнацијата на пристапниот процес“, смета д-р Иван Дамјановски, истражувач во ИДСЦС. Тоа значи дека намалувањето на процентот не зависи од евроскепитицизмот кој владее во Европа и од политичката криза во земјата.
„Поддршката за членство на Македонија во ЕУ, не се заснова на очекувања за лични и материјални придобивки, туку на антиципација на идните општествени и економски придобивки од членството во ЕУ. Мнозинството на граѓани сметаат дека процесот на пристапување во ЕУ ќе има позитивен придонес кон зајакнување на владеењето на правото“, вели Дамјановски.
„Потребата од емпириски податоци, за да не се шпекулира во јавноста по однос на прашањата кои се однесуваат на перцепцијата за Европската унија, е целта поради која ИДСЦС ги прави овие истражувања“, изјави Марко Трошановски, претседател на ИДСЦС.
Презентираните анализи се спроведени во соработка со германската Фондација „Конрад Аденауер“, како дел од активностите за поддршка на развојот на демократските процеси, преку промоција на креирање на политики базирани на истражување.
Марија Теговска