Најмалку 18 Палестинци се убиени откако израелски напад со беспилотно летало ја таргетирал полициската единица на Хамас, која се обидувала да воспостави контрола врз пазарот во градот Деир ал-Балах во централна Газа, изјавија за Би-Би-Си доктор и очевидци.
Очевидци изјавија дека израелските беспилотни летала пукале кон припадници на полициските сили на Хамас, облечени во цивилна облека и маски, кои се соочувале со продавачи кои ги обвинија за зголемување на цените и продажба на стока ограбена од камиони за помош.
Министерството за внатрешни работи, управувано од Хамас, го осуди нападот, обвинувајќи го Израел дека извршил „ново злосторство против полициска единица задолжена за одржување на јавниот ред“.
Видео снимките од последиците покажуваат тела расфрлани на земја и панични купувачи кои врескаат, додека амбулантните возила брзаат да им помогнат на повредените.
Инцидентот се случи во време кога цивилите во Газа продолжуваат да се борат да дојдат до храна, при што речиси секојдневно се случуваат пукања во и околу дистрибутивните места на Хуманитарната фондација за Газа (GHF) поддржана од САД и Израел во јужна и централна Газа, а ограничените стоки достапни на пазарите се продаваат по многу надуени цени.
GHF – која е обвинета за кршење на хуманитарните принципи од страна на меѓународните хуманитарни групи – во четврток доби дополнителни 30 милиони долари финансирање од САД, кои ги поддржаа израелските напори да стане најголемата хуманитарна организација во Газа.
Д. Мишев
