Започна гласањето во вториот круг на локалните избори во 35 општини во Република Македонија. Во текот на изминатите денови, ЦИВИЛ – Центар за слобода излезе со бројни содржини во кои јавноста се информираше за текот на кампањите, проблемите и нерегуларностите, предизвикани од партиите или од институциите, а објави и низа информативно-едукативни содржини.
ЦИВИЛ уште еднаш ја нагласи законската, политичката и моралната обврска на државата и партиите да спроведат слободни избори. Исто така, се пишуваше во повеќе наврати за тоа како граѓанките и граѓаните можат да го обезбедат своето гласачко право доколку не се најдат на Избирачкиот список, а го објави и Упатството за гласање од ДИК. Прес центарот на ЦИВИЛ отвори во 6:30 часот денеска и ќе работи до полноќ или подоцна, сѐ додека за тоа има потреба.
Од ЦИВИЛ порачуваат дека е од особена важност да се прочитаат и почитуваат препораките на организацијата упатени до јавноста на 13 октомври.
Право на глас во овие 35 општини, според Избирачкиот список имаат 833.716 гласачи, распоредени на 1.517. На гласачките места во 13 казнено-поправни установи своето избирачко право можеа да го остварат 939 гласачи. И во текот на вчерашниот ден, на дел од лицата кои се во притвор или на издржување казна затвор, повторно им беше повредено правото на глас.
Постои изразен интерес и за набљудување на овие локални избори од страна на домашни и странски организации и медиуми. Државната изборна комисија за Локалните избори издаде акредитации за набљудување на вкупно 5.101 домашни, 473 странски набљудувачи, 315 преведувачи и 20 странски новинари. ЦИВИЛ ги набљудува локалните избори со 206 акредитирани набљудувачи, а теренот го чешлаат дополнителни 30 граѓански новинарки и новинари.
ЦИВИЛ – Центар за слобода им посакува мирен и достоинствен изборен ден на сите граѓанки и граѓани на Република Македонија.
Џ.Д.
