Здружението на новинарите на Македонија со соработка со ОнЛимит Медиа, вчера ја организираа дебатата на тема „Предизвици на Владата и институциите во зголемување на транспарентноста пред медиумите и граѓаните“, на која учествуваа министерот за транспарентност и отчетност Роберт Поповски, претседателот на ЗНМ, Насер Селмани и новинарката Сашка Цветковска.
„Се додека нема политичка одговорност, но и санкции за овие функционери кои не даваат информации, кои се побарани од страна на новинарите, не може да се смета дека имаме сериозна демократија“, истакна претседателот на ЗНМ, Насер Селмани.
Тој во своето обраќање рече дека е добро што Владата има декларативна заложба за да биде транспарентна и има преземено мерки со цел новинарите да имаат повеќе информации, но дека непочитувањето на правото на новинарите за слободен пристап до информации е кршење на слободата на изразувањето.
Според министерот Поповски, Владата е целосно посветена за зголемување на транспарентноста и отчетноста кон јавноста и медиумите.
„Транспарентноста и отвореноста кон јавноста значат одговорно владеење. Оваа и многу други дебати се активности во тој правец за тоа како можеме сите заедно да ја промениме културата на политичкото однесување во општеството, а ние сме посветени да го направиме тоа“, истакна тој.
Според новинарката Сашка Цветковска, Владата го променила односот кон медиумите и новинарите, но проблемот кој останува е неодговорноста на институциите и на јавните функционери кога има јавен податок, кога тој ќе биде пренесен во медиумите и ќе биде евидентно сфатено дека има злоупотреба на службена должност и прекршување на одредени закони, а кога не се постапува од страна на институциите.
А.П.
