„Моја законска обврска е да го чекам (Иванов) 10 дена. Нема што да се молиме. Од 20-ти натаму, сè ќе зависи од волјата на мнозинството во парламентот“, рече претседателот на Собранието, Талат Џафери на денешната средба со новинарите. Според него, по тој рок, може да се формира влада во парламентот со мнозинство од пратениците.
Џафери на кафе-средбата со новинарите изрази очекување дека Иванов ќе го додели мандатот во определениот рок, а „варијантата“ да не го додели – со какво било образложение – според него, значи дека Иванов го прекршува Уставот. „Според Уставот, претседателот на Република Македонија има обврска и должност да го даде мандатот во рок од 10 дена и не се работи за тоа дали сака или не. Мандаторот има рок од 20 дена да го подготви предлогот за влада и да го достави до Собранието, а спикерот во рок од 15 дена да свика седница за избор на владата“, потенцираше Џафери.
Собранискиот спикер смета дека би требало да се формира анкетна комисија за настаните од 27 април, која ќе испита сè, бидејќи „тука има и политичка и физичка штета, вмешани се и пратеници, и неминовно е покренување политичка одговорност за тие што се вмешани“.
Џафери рече и дека иако најавил оти првата седница на парламентот ќе биде за формирање влада, доколку добие предлог од политичките партии, постигнат со консензус, за одредување датум за локалните избори, тој ќе свика седница, бидејќи до недела функционираат локалните власти, а потоа им истекува мандатот на градоначалниците и на општинските совети.
На прашањето дали ако се формира влада без доделен мандат од претседателот на државата Ѓорге Иванов, тој повторно очекува немири и протести, Џафери рече: „Не исклучувам ништо, граѓаните имаат право да протестираат, но апелирам дека е беспредметно и непримерно да се повтори 27 април“.
Џафери ја исклучи можноста за импичмент, бидејќи за тоа треба двотретинско мнозинство. Тој додаде дека го почитува правото на поднесување на иницијатива до Уставниот суд, за испитување на уставноста на неговиот избор за претседател на Собранието, меѓутоа, нагласи и дека ниту една институција не може да го укине правото на мнозинството пратеници да одлучат за функционирање на законодавната власт.
„Ние имаме законодавна, извршна и судска власт и така треба да остане“, истакна Џафери.
Текст и фото: Дехран Муратов / Марија Теговска