Наместо да глумиме изненадени и навредени од сумата со која СДСМ ја даруваше Сител за рекламирање на својата партија, бидејќи тоа го правеше и во изминатите години, можеби е редно време да се позанимаваме со реалните проблеми кои се наметнуваат од ова прашање.
Наместо да одиме по линијата на помал отпор и релативизирачката реторика, можеби е време да видиме како стоиме со законите во оваа држава, нивното почитување и одговорноста која непочитувањето на истите ја носат со себе.
Ќе речете нема, ама има голема разлика.
За почеток ќе прашам, која ни е крајната цел? Да ја повториме судбината на А1 по конечната триумфална победа на Груевски и компанијата? Ако ни е тоа целта, ајде да ја затвориме и Сител и да лажеме дека дошол животот и демократијата во Македонија.
За мене поголем проблем од парите кои се слеале или допрва ќе се слеат на сметката на овој изговор од телевизија, кој со години работеше во служба на режимот, сееше страв и омраза, бескрупулозно лажеше и манипулираше со јавноста, е фактот што ниту една власт или партија не смее да се однесува како приватна фирма.
Поголем проблем е тоа што тој „медиум“ се уште го водат мечки од пештери со гаќи од 500 евра и уредници кои се уште не одговараат за говорот на омраза во (според вашите толку ценети анализи и рејтинзи) најгледниот Дневник и отворените повици за линч на неистомислениците на не така далечниот режим.
Поголем проблем е што главен аргумент за оправданоста за слевање на толкава сума пари се користи тоа дека „СДСМ победи затоа што се рекламира на телевизијата на еден криминалец“ и бласфемичен изговор дека со ваквата постапка СДСМ испратила порака до меѓународната јавност за нормалното функционирање на демократијата.
Оправдана е реакцијата на сите критички настроени медиуми и граѓани кои се бореа против режимот што владеачката партија решила најмногу средства да издвои за тв-куќата која до вчера ја обвинуваше за водење на отворена пропаганда во корист на ДПМНЕ. Но редно време е да ги нарекуваме нештата со вистинското име. Дали целта ги оправдува средствата е едно прашање, а сосема друго е констатацијата дека се е исто само актерите се сменети.
Тука некаде ќе го поставам и второто прашање. Како тоа ВМРО ДПМНЕ воопшто не платила реклами на Сител за вториот круг и дали само тоа јас халуцинирав дека ги емитуваат токму во најударниот термин? Или можеби, тука важи правилото од љубов сепак се живее?
Кутрите денеска дури и со соопштение излегле. Велат СДСМ не знае да го прикрие своето расипничко трошење, неспособност и безидејност во водењето на државата. Да! Знаеме… Нема подобри од нив во оваа дисциплина. Затоа, ако не знаете како да си ги потрошите парите, следен пат прашајте го ВМРО!
Да резимираме, рекламирање на национална телевизија за време на политичка кампања не е квантна физика, сè додека сме сигурни дека тие пари не се исплатени од буџетот. А поддршката на медиумите е нешто за што допрва треба да се договориме што сакаме. Ќе ја повторуваме историјата или конечно ќе ги ослободиме од канџите на криминалците и профитерите?
