Според извештајот од Меѓународната кризна група (ICG), Косово ја добива битката за контрола на северот со мнозинско српско население, додека надежите за нормализација меѓу Приштина и Белград се гаснат, пренесуваат косовските медиуми.
Косовскиот министер за внатрешни работи Џелал Свечла изјави дека околу 400 српски екстремисти се обучуваат околу границата со Косово.
Според него, потребна е само наредба од српскиот претседател Александар Вучиќ за да го започнат нападот.
Ова се дел од темите од денешниот редакциски избор на ЦИВИЛ медиа, од албанските медиуми во регионот.
КОСОВО
ВОА- ИЦГ: Иднината на српското малцинство во Косово е од витално значење за приближувањето меѓу Белград и Приштина
Меѓународната кризна група во вторникот рече дека Косово и Србија, како и надворешните поддржувачи, треба да работат на ублажување на краткорочните ризици од насилството на северот со мнозинство српско население, а потоа да бараат начини да обезбедат стабилност во областа.
Во извештајот на оваа организација, кој изготвува независни анализи и совети за спречување, решавање и управување со конфликти, се наведува дека „Косово ја добива битката за контрола на северот со мнозинско српско население, додека надежите за нормализација меѓу Приштина и Белград се гаснат“, пренесува ВОА.
ИНА: Се појавија детали за 400-те српски екстремисти кои се обучуваат во Србија, експерт открива три главни точки каде може да се случат напади
Косовскиот министер за внатрешни работи Џелал Свечла изјави дека околу 400 српски екстремисти се обучуваат околу границата со Косово.
Според него, потребна е само наредба од српскиот претседател Александар Вучиќ за да го започнат нападот.
„Околу 400 српски екстремисти се обучуваат во областите околу границата со Косово и со наредба на Вучиќ можат да бидат активирани во агресивни напади“, рече Свечла, пренесува ИНА.
Клан Косова: Русија може да изврши сајбер напади врз електричната мрежа на Косово, вели пензиониран американски адмирал
Џејмс Ставридис, пензиониран адмирал на американската морнарица, во исто време и поранешен врховен командант на сојузничките сили на НАТО, предупреди дека Русија може да развие хибридна војна на Балканот.
Во мислењето објавено во „Блумберг“, Ставридис рече дека Кремљ може да изврши сајбер напади врз енергетската мрежа на Косово.
„Покрај силите за стабилизација, НАТО мора да биде свесен за руската употреба на таканаречената хибридна војна. Путин е добар во користењето на социјалните медиуми, кампањите за дезинформација и проруската пропаганда за да создаде тензии надвор од неговите граници. НАТО мора да ги користи своите информативни мрежи за да ги разоткрие и спротивстави овие лажни наративи.
Ако Русите решат да ја подигнат границата, би можеле да искористат сајбер напади против електричните мрежи и други витални цели во Косово и несрпските делови на Босна.“, посочува Ставридис меѓу другото, пренесува Клан Косова.
АЛБАНИЈА
Телеграфи: Политичкиот екстремизам во Албанија е позагрижувачки од верскиот
Во Тирана, Институтот за демократија и медијација (ИДМ) денеска објави студија, според која граѓаните повеќе се загрижени за политичкиот екстремизам отколку за верскиот екстремизам.
Студијата покажа дека верскиот екстремизам е грижа за над 30 отсто од граѓаните, додека политичкиот екстремизам е грижа за над 43 отсто од населението.
Над 76 отсто од испитаниците сметаат дека владејачките актери во Албанија ги злоупотребуваат државните институции и ресурси за тесни политички интереси, пренесува Телеграфи.
КОЛУМНА
Коха: Украина и Газа во потрага по принцип
„Косово треба да ја премести својата амбасада од Ерусалим во Тел-Авив. И како што со право го поддржува правото на Израел да се брани, треба да го поддржи правото на Палестинците на живот, минимум, а потоа и на слобода од окупација.“, пишува Авторот Ветон Сурои во колумната „Украина и Газа во потрага по принцип“, објавена во Коха.
Подготви: Д. Тахири
