ЦИВИЛ – Центар за слобода подготвува анализа на застапеноста на темите поврзани со меѓуетничките и меѓуверските односи во медиумите. За таа цел, ЦИВИЛ ги праша редакциите на медиумите низ целата држава колку и на кој начин се застапени темите поврзани со меѓуетничките и меѓуверските односи во медиумите.
Од Рацин.мк (www.racina.mk) добивме одговор од главниот уредник, Зоран Бојаровски, кој во продолжение го пренесуваме во целост:
„Темите поврзани со меѓуетничките и меѓуверските односи имаат врвно и приоритетно место во содржините на порталот Рацин.мк во сите новинарски форми.
Оваа определба доаѓа од таму што во македонското општество и политичката пракса, за жал, има сѐ уште пукнатини низ кои се протнуваат содржини со потенцијал и намера да ги влошат внатрешните конфликти, особено меѓу заедниците на етничките Македонци и етничките Албанци, но и меѓу другите заедници во државата.
Посебно изразен интензитет и системска организираност овие содржини добиваат во кампањите со говор на омраза и дезинформации и ги таргетираат стратешките прашања на Северна Македонија, меѓу кои едно од најважните е мултикултурализмот.
Зад овој уредувачки концепт и определба стои потребата од постојано медиумско укажување на штетите од овие појави, како и посветеноста да се влијае на подобрување на државните и граѓанските механизми за идентификување, превенција, но и правно и општествено санкционирање на овие неприфатливи облици на политичка и јавна комуникација.