Демократската јавност во Македонија и Грција ја поздравија првата средба меѓу премиерите Зоран Заев и Алексис Ципрас, на која двајцата премиери во изразито пријателска атмосфера ги искажаа своите искрени намери да го решат повеќедеценискиот спорт меѓу двете земји.
Средбата меѓу премиерите Зоран Заев и Алексис Ципрас во Давос, за време на Светскиот економски форум е вовед во една нов, модерен начин на водење политика. Средба на која двајцата премиери манифестираа лидерска храброст и визионерство, ослободени од чаурите на назадното мислење и деструктивните практики на просечните балкански политичари.
„Крајното решение мора да биде прифатливо за двете страни. Решението мора да биде во заштита на националното достоинство и идентитет на нашите народи. Објавувам дека ќе го смениме името на аеродромот и автопатот. Автопатот ќе се вика Пријателство“, рече премиерот Заев на средбата.
Во меѓувреме, националистите не мируваат. По солунскиот, се најавува нов протест и во Атина, на 4 февруари, против компромисно решение на спорот за името со Македонија. Овие најави доаѓаат по протестите во Солун на 4 февруари, на кој учествуваа околу 90.000 луѓе, според официјални податоци од грчката полиција. Протестот во Солун беше оценет како неуспешен, особено ако се земе предвид дека протестот против името на Македонија во 1994 година привлече најмалку двојно повеќе луѓе на улиците на Солун.
Но, состојбите се променети. Грчкото општество со години е потресено од тешки економски проблеми и кревка политичка состојба, зачинета со силни дози национализам и ксенофобија. Од друга страна, просечниот грчки граѓанин или граѓанка има многу посериозни секојдневни грижи, отколку да се занимава со прашањата кои националистите меѓу политичарите и свештенството се обидуваат да ги наметнат во јавниот дискурс.
Нашиот соработник, грчкиот фоторепортер Александрос Стаматиу, кој напиша неколку ексклузивни прилози во изминатите неколку дена, меѓу кои и разговорот со генералот во пензија Фрагулис, во разговор со ЦИВИЛ Медиа сподели: „Граѓаните на Атина не веруваат дека тоа ќе биде голем протест. На социјалните мрежи во Грција многумина пишуваа подбивно за протестот, велејќи дека ‘Солун го украде карневалот од Патра’ и го нарекоа националистички кич“.
Според нашиот соработник, на протестот во Атина се очекуваат и антинационалистички протести во организација на левичарите и помали вонпарламентарни партии.
Пензионираниот генерал Фрагос Фрагулис, кој за ЦИВИЛ Медиа изјави дека „сега е време да ја зачуваме нашата Македонија“ е типичен претставник на националистите. Стаматиу, инаку одличен познавач и на македонските прилики, иронично забележа: „Тој кокетира со сите, и со Златна Зора и со расцепканата Неа Демократиа. Во Македонија имате ликови како Бетмен и Јанко Бачев, а во Грција тоа е Фрагос Фрагулис“.
Во периодот што ни претстои, ќе се одмеруваат силите меѓу визионерските, модерни политички опции и деструктивните, изолационистички и националистички тенденции.
Џ. Дерала
