пишува: КОСТА СТОИМЕНОВСКИ
Во последно време во Македонија мошне актуелно е прашањето за даноците. Поранешната влада го воведе рамниот данок, со тврдење дека таквиот данок придонесува за стимулирање на економскиот развој на дражавата. Актуелната влада поаѓајќи од идеолошки консидерации и огромните социјални разлики кои постојат во македонското општество се определи да воведе прогресивен данок. Во економската теорија мошне добро се познати предностите и недостатоците и на едниот и на другиот данок. Познато е исто така дека рамниот данок оди во прилог на богатите, додека со прогресивниот данок се создаваат услови за градење на правично општество во кое нема екстремни социјални разлики. Како најдобар пример за правично и добро општество најчесто се наведуваат Шведска и останатите скандинавски земји.
Определбите на актуелната македонска влада да воведе прогресивен данок предизвика незадоволство кај стопанствениците, кои се најбогати луѓе во државата! Богатството на нашите капиталисти е неспоредливо помало од богатството на капиталистите во високо развиените земји, меѓутоа, социјалните разлики во македонското општество се енормни и претставуваат серизна пречка за успешен економски развој и за мирот и стабилноста на државата! Нема и не може да има мир и стабилост во држава во која мал број луѓе континуирано прогресивно се збогатуваат и водат луксузен живот, додека значаен дел од граѓаните немаат пари ни за леб! Ниедна држава не може да биде одржлива доколку нема функционална економија, која би била базирана на конкуренција и на владеење на правото! Нема напредок на држава во која најмногу стотина богати луѓе имаат монопол на(д) економијата и кои се јавуваат како единствени „играчи“ на берзата и на тендерите!
Согласно проценките на Владата воведувањето на прогресивниот данок ќе придонесе за зголемување на буџетот за 25-30 милиони евра, кои би се користеле за зголемување на платите на медицинарите и наставниците. Меѓутоа, со парите што би се добиле со прогресивниот данок можат да се прават сaмо козметички дотерувања, но не и битно подобрување на социјалната мапа во државата!
Најголеми социјални разлики во нашата држава се направени со криминалната приватизација на општествениот/државниот капитал. Законот за приватизација беше донесен во 1993 година кога во Собранието имаше опозиција, а приватизацијата на општествениот/државниот капитал се изврши по нерегуларните парламентарни и претседателски избори во 1994 година, кога, поради познати причини во Собранието на РМ немаше опозиција! Наместо пред приватизацијата да се врати одземениот имот на поранешните сопственици, како што тоа беше направено во некои други поранешни социјалистички земји, Законот за денационализација беше донесен дури по смената на власта во 1998 година.
Приватизацијата во Македонија се вршеше во мошне матна атмосфера и во интерес на одбрана привилегирана малубројна група луѓе, кои стануваа газди на мошне вреден имот за ич пари! Со подршка и помош на власта, овие луѓе станаа сопственици на мошне вреден имот (деловн простор градежно земјиште, хотели, банки и слични финансиски институции итн.). За да станат газди, многу претпријатија намерно се обезвредуваа, се затвараа бројни фабрики, што доведе огромен број работници да останат без работа. Со астрономските затезни камати на сметките на богатите се акумулираа големи профити од неинформираните и/ли дезинформирани и изманипулирани граѓани! Мошне негативна улога во криминалната приватизација одиграа корумпирани стечајни управници и корумпирани стечајни судии, кои за својот придонес во матната приватизација се стекнаа со огромни богатства!
Впечаток е дека актуелната македонска власт е свесна за гревовите на претходните раководства на СДСМ и за штетите кои им беа нанесени на голем број граѓани и најавува мерки за санирање на некои од нив. По повеќе од две децении решено е прашањето на некои стечајци, кои залудно протестираа и бараа да им биде доделена макар минимална помош. Меѓутоа, впечаток е дека ни актуелната власт не е подготвена за порадикални промени, кои би воделе кон намалување на социјалните разлики во државата!?
Актуелното раководство на СДСМ, кое управува со државата, треба да има предвид дека Македонија спаѓа во редот на земјите со најголеми социјални разлики во Европа и во светот и дека прогресивниот данок на платите не може да биде единствен инструмент за намалување на социјалните разлики и за воспоставување на поправично општество во нашата држава. Мислам дека би било добро актуелната власт да иницира средба со луѓето кои со криминалната приватизација го разграбија државниот капитал, со цел изнаоѓање на модел за нивно учество во надминувањето на огромните социјални разлики во државата. Решението би требало да се бара во воведувањето на прогресивен данок на имотот и на приходите од имотот!
Целосно сум свесен дека ставовите и мислењата што се изнесени во написов нема да наидат на одобрување од страна на олигарсите во нашата држава. Меѓутоа, како човек кој слободно размислува и кој секогаш води сметка за интересите на државата и, јавно и отворено на политичарите им укажував на застранувањата, на грешките, гафовите и глупостите! Дражава во која постојат екстремни социјални разлики не може нормално да функционира, така што од неа бегаат не само луѓето кои се иселуваат, туку и капиталот, кој се сели во држави кои се функционални и во кои владее правото!
Преземање на содржините e ЗАБРАНЕТО (!!!), освен со писмена дозвола од ЦИВИЛ и тоа исклучиво според Условите за користење, авторски права и заштита на приватноста. Повредата на авторските права е забранета со закон. Врз основа на договор за соработка, оваа содржина е достапна за Плусинфо и Слободен печат без ограничувања.
