ВЕСТ НА ДЕНОТ
На неформалниот состанок на лидерите на Европската унија со претставниците на земјите од Западен Балкан, Украина и Молдавија, беше заклучено дека е неопходно да се заокружи визијата за ЕУ збогатена од Западен Балкан, Украина и Молдавија. Во Заедничката декларација се наведува дека на неформалниот состанок во Атина била подвлечена потребата од обновен и рефокусиран процес на проширување што е опиплив и веродостоен, без кратенки до воспоставените услови.
На неформалниот состанок во Атина, на покана на грчкиот премиер Киријакос Мицотакис, учествуваше и претседателката на Советот на министри на Босна и Херцеговина, Борјана Кришто, претседателот на Србија Александар Вучиќ, премиерот на Северна Македонија Димитар Ковачевски, хрватскиот премиер Андреј Пленковиќ, претседателот на Црна Гора Јаков Милатовиќ, премиерот на Косово Албин Курти, премиерот на Грција Киријакос Мицотакис, претседателот на Украина Володимир Зеленски, претседател на Молдавија Маја Санду и премиерот на Романија Јон-Марсел Колаку. Присутни беа и претседателот на Европскиот совет и претседателот на Европската комисија Шарл Мишел и Урсула фон дер Лајен.
ИЗЈАВА НА ДЕНОТ
„Навистина сметам дека не е мое да зборувам за тоа како тече процесот на уставните измени. Јас сум амбасадор на САД. Ние не сме дел од Европската Унија, но кога ја гледам границата и големиот број возила кои влегуваат и излегуваат, сметам дека просперитетот и безбедноста на оваа држава е во нејзиното пристапување и интеграција во Европа и навистина се надевам дека политичарите од сите политички партии во земјава ќе работат кон остварување на тоа. Границата со Грција не потсетува на тешките одлуки што оваа земја веќе ги направи, и знам дека и ова е тешко, но ги охрабрувам граѓаните да им дадат до знаење на нивните политичари дека тие сакаат да бидат дел од ЕУ“, изјави Амбасадорката на САД, Анџела Агелер, по денешната посета на Граничниот премин „Богородица”,
ВОЈНА ПРОТИВ УКРАИНА
Писмо со висока доверливост од началникот на Генералштабот на руската армија, Валериј Герасимов, откри сериозна загриженост за можен целосен бунт на чело со елитните Воздухопловни трупи (ВДВ) против владата на Владимир Путин.
*
Во рамки на посетета на Атина, премиерот Димитар Ковачевски денеска оствари средба со претседателот на Украина, Володимир Зеленски на која ја нагласи континуираната и силна македонска поддршка на Украина во напорите за одбрана на земјата и враќање на слободата и мирот, а со тоа и стабилноста во регионот.
*
Претседателот на Србија, Александар Вучиќ, денеска соопшти дека имал добар и отворен разговор во Атина со претседателот на Украина, Володимир Зеленски, за сите важни прашања, како за Србија и Украина, така и за целиот регион и светот.
ФЛЕШ ВЕСТИ
ИНТЕГРАЦИИ: Проширувањето на ЕУ со државите од Западен Балкан е врвен безбедносен интерес за ЕУ, потенцираше министерот за надворешни работи Бујар Османи во денешното обраќање на летната академија “Quo vadis Europa?”, во Сантандер, Шпанија, организирана од страна на високиот претставник на ЕУ за надворешна политика, Борел и Меѓународниот универзитет Менендез Пелајо.
ОБРАЗОВАНИЕ Завршуваат реконструктивните активности во 56 училишни објекти кои се дел од акцискиот план на Министерството за образование и наука за унапредување на условите за следење настава и за работа, за оваа календарска година. Дел од учениците ќе ја започнат новата учебна година во нови кабиенти, тоалети, училници.
ЧОВЕКОВИ ПРАВА Во Авганистан во моментов нема жени кои играат фудбал. Ниту на теренот, ниту на светската ранг-листа на ФИФА. Од март 2022 година, Светската фудбалска асоцијација (ФИФА) ја наведува женската селекција под клучниот збор „Авганистан“: „повеќе не е на списокот“.
ЦИВИЛНИ АКТИВНОСТИ
ЦИВИЛ – Центар за слобода, како организација за човекови права и слободи, најостро го осудува насилството во секоја форма. Нападите врз медиумските екипи е крајно неприфатливо и заслужува секаква осуда и остра законска санкција.
Нападот врз новинарските екипи е кривично дело, па така и последниот напад врз снимателот на ТВ Алсат-М претставува грубо кршење на Кривичниот закон. ЦИВИЛ ја поздравува брзата реакција на институциите и бара да му се даде максимална казна на насилникот, како и осуда од јавноста.
На снимателот и колегиумот на ТВ Алсат-М му изразуваме целосна поддршка и солидарност, се вели во соопштението на ЦИВИЛ.
ПО ДОПРЕН ГЛАС
Не, не власта, и таа не е баш цвеќе за мирисање но, овојпат, делегитимирана е опозицијата и тоа, кажано во една реченица и со потенцирање на само два, три сосема јасни и непобитни факти е дека, со својата собраниска гласачка машина, токму ВМРО-ДПМНЕ е факторот кој во овој актуелен политички миг земјава, прво, ја држи вкотвена во сопствениот децениски институционално нефункционален и партиски коруптивен амбиент… “, вели, ПО ДОПРЕН ГЛАС, Зоран Иванов во „Овојпат не власта туку делегитимирана е опозицијата“.
Подготви: Б. Јордановска