Дерала, ЦИВИЛ: ЦИВИЛ – Центар за слобода, во моментов, соработува на терен со повеќе десетици луѓе, низ целата земја. Тоа се луѓе коишто ја скенираат состојбата веќе подолго време, во контекст на референдумот. Тие практично од првиот ден, од потпишувањето на спогодбата меѓу Македонија и Грција, ја набљудуваат состојбата на политичко, социјално и медиумско ниво. Тоа се луѓе коишто и претходно работеле и соработувале со ЦИВИЛ како граѓански новинарки и новинари, или спроведувале мониторинг на состојбите со човековите права и слободи. Во наредниот период од четири недели, тие ќе работат уште поинтензивно, пофокусирано и поструктуирано, на набљудување на спроведувањето на самиот референдумски процес.
Наш фокус е, се разбира, правото на глас на граѓанките и граѓаните, како фундаментално човеково право. Дали и колку нивното право е овозможено, односно обезбедено.
Пред се, се обидуваме да ги согледаме сите последици од лошиот Избирачки список за којшто востановивме дека не е во добра состојба, наспроти оптимистичките најави од институциите. Последиците од таквиот неквалитет на Избирачкиот список ќе бидат согледани, за жал, многу доцна, дури на денот на референдумот.
Ние, исто така, обрнуваме внимание на тоа дали граѓанките и граѓаните се под притисок на одредени структури во земјата. Поточно, дали тие се заплашувани или на било каков начин се опструирани за да го искористат своето право на глас на денот на референдумот. И, веќе имаме согледувања на тој план.
Понатаму, нашите долгорочни набљудувачи ќе го набљудуваат и спроведувањето на процесот на референдумот од институциите. Освен Државната изборна комисија и општинските изборни комисии, ќе бидат набљудувани и локалните власти. Ќе бидат набљудувани и постапките, односно спроведувањето на законските надлежности на Министерството за внатрешни работи. Но, исто така, многу сериозен фокус е и говорот на омразата и повиците на насилство. Тоа гледаме дека е ужасно интензивирано во последно време. Мислам дека ЦИВИЛ беше меѓу првите и најгласните организации кои укажуваа на тоа дека говорот на омразата може негативно да влијае врз спроведувањето на референдумскиот процес. Тие структури што се занимаваат со дистрибуција на омраза и со повици на насилство, повикуваме постојано да бидат санкционирани според законот.
Дознаваме од Министерството за внатрешни работи дека досега има над стотина пријави поднесени во Основното јавно обвинителство, меѓутоа, за жал, во овој момент не гледаме никаква разрешница. Тоа, според нас, е неприфатливо однесување на една важна, сериозна и одговорна институција во земјата.
Исто така, забележуваме дека говорот на омразата и насилството, повиците на насилство, поделбите меѓу луѓето…, ги спроведуваат и институции кои би требало да бидат на висина на својата задача. За жал, освен политички партии и други иницијативи коишто се очигледно поврзани со политички партии од опозицијата, и кои, исто така, се мета на дејстувањето и работата на странски разузнавачки служби, за што сме пишувале, гледаме дека и Црквата се приближува кон таквата негативна кампања која сее омраза меѓу луѓето. Што е спротивно на сите кодекси на оваа голема и важна институција.
Во секој случај, ЦИВИЛ ќе има и набљудување што се однесува и на однесувањето на невладините организации, на други иницијативи и на сите засегнати страни во целиот референдумски процес. Притоа, ќе имаме сериозна активност на нашата медиумска платформа, но уште поагресивна и динамична кампања – на самиот терен, која ќе се разликува од кампањата што ја спроведуваат и бојкотирачите, и Владата и Европската унија. Односно, ние ќе се обидеме да дадеме свој придонес кон повикувањето на граѓанките и граѓаните да го искористат своето право на глас. Излезноста е многу важна! Шансата да се искористи оваа демократска алатка, да се одлучи за едно важно прашање, е многу голема и важна и сметам дека учеството на ЦИВИЛ во овој процес ќе биде од пресудна важност.
Обработка на текст: Маја Ивановска
Камера: Атанас Петровски
Монтажа: Ариан Мехмети
Фотографија: Дехран Муратов
Видео-став на ЦИВИЛ е содржина што се објавува секојдневно и се однесува на актуелните општествени состојби.
Услови за користење, авторски права и заштита на приватноста
Преземање на содржините под различни услови од наведените НЕ Е ДОЗВОЛЕНО, освен со писмена дозвола од ЦИВИЛ. Повредата на авторските права е забранета со закон.
[divide]
Содржината е дел од граѓанската иницијатива „Зачекори напред!“, финансирана од Фондацијата Отворено општество – Македонија. Содржината е единствена одговорност на авторите и на ниту еден начин не може да се смета дека ги изразува гледиштата и ставовите на граѓанската иницијатива „Зачекори напред!“.
