„Владите треба да работат во интерес на граѓаните. Со олеснувањата на соработката на економски план, ќе има конкретни резултати, како за граѓаните и компаниите во нашите земји, така и во регионалната соработка, а со тоа ќе ги унапредуваме и евроатлантските интеграции. Република Македонија продолжува со конструктивната улога во овие процеси“, рече меѓу другото, премиерот Зоран Заев во завршното обраќање на Самитот во Драч, Албанија.
На неформалниот Самит на премиерите од Западен Балкан (на Македонија, Србија, Црна Гора, Албанија, Косово и претседавачот со Претседателството на БиХ), што се одржа на иницијатива на премиерот на Република Албанија Еди Рама, а на којшто учествуваа и еврокомесарот за проширување на ЕУ, Јоханес Хан и заменик претседателот на Светска банка, Кирил Милер, како и регионални претставници на Светска банка, биле договорени конкретни чекори за имплементација на Акцискиот план за Регионалната економска област договорена на Самитот во Трст.
Договорено е да се воведе редовен систем за следење на имплементацијата на Акцискиот план, под директен надзор на политички претставници на премиерите на земјите во регионот.
Самитот беше замислен како средба во конструктивна атмосфера во контекст на определбата за продлабочување на регионалната соработка, преку развој на пријателски односи меѓу премиерите на државите од Западен Балкан. Еврокомесарот Хан и претставниците на Светска Банка ги поддржуваат напорите на регионот во евроатлантските перспективи, а општ впечаток на присутните, е дека и Самитот во Драч е уште еден доказ за унапредување на доброседските односи, како и за постоењето на силна политичка волја за продлабочување на регионална соработка што ќе го унапреди квалитетот на живот на граѓаните и ќе придонесе кон евроатлантските интеграции.
