Артан Груби, на денешната прес-конференција изјави дека е убеден дека на крајот разумот ќе победи и дека ќе има двотретинско мнозинство за прифаќање на уставните измени.
Денеска во Собранието нема расправа за уставните измени. Таа е закажана за утре, но неколку пратеници од владејачката коалиција денеска се огласија преку прес-конференции од Собранието.
Груби додаде дека предвремени избори не се решение, а решение е Македонија да стане членка на ЕУ и НАТО, почнувајќи после дебатата за уставните промени.
„Сметам дека сите 120 пратеници треба да ги поддржиме уставните амандмани, да ги изгласаме, бидејќи тие ни овозможуваат интеграција во НАТО и ЕУ. Имаме шанса Македонија да ја направиме евроатлантска, а верувам дека сите 120 пратеници тоа го посакуваат“, изјави Груби.
Од Собранието денеска владејачкото мнозинство уште еднаш испрати порака до пратениците на опозицијата, да ја сфатат сериозноста на историската можност што и се укажува на Македонија.
Томислав Тунтев изјави дека пратениците имаат одговорност пред граѓаните и треба да ја почитуваат нивната одлука изразена на референдумот, така што Собранието ќе ги усвои измените. Според него, тоа е пакт што мора да биде изоден заедно со власта и опозицијата.
„Алтернатива не постои, секој друг предлог е туркање во изолација. Македонија му припаѓа на западно-европскиот свет без разлика што Христијан Мицкоски има проблем со тоа“, додаде Тунтев.
Тунтев вели дека е убеден дека неговите колеги пратеници од ВМРО-ДПМНЕ се за ЕУ и НАТО, дека сега е историски момент тоа да го покажат на дело, и се надева дека утре ќе го имаат потребното двотретинско мнозинство.
Во денешното соопштение на опозициската ВМРО-ДПМНЕ стои дека пратеничката група нема да ги поддржи уставните измени.
„Граѓаните јасно и недвосмислено кажаа дека референдумот е неуспешен, а договорот мртов. Јаловата дебата која што се води во Собранието е непродуктивна и претставува кршење на волјата на граѓаните“, стои во соопштението на ВМРО-ДПМНЕ.
А. Петровска