Големо мнозинство од граѓан(к)ите во Македонија (70,4%), се убедени дека економската состојба во државата годинава ќе се придвижи на полошо или ќе остане во иста состојба. Наспроти овој процент кој зборува за генералниот песимизам помеѓу испитаниците, само 24,8% се позитивно настроени и сметаат дека економската состојба ќе се подобри, покажуваат податоците од последната анкета на агенцијата „М- Проспект“.
Анкетата го испитуваше и јавното мислење за стабилноста на пензиското осигурување. Во однос на ова прашање, граѓан(к)те се поделени во своите размислувања.
49% од анкетираните целосно или „до некаде“, имаат доверба во пензискиот систем, а 45,5 % од испитаниците воопшто или „до некаде“, немаат доверба дека пензиското осигурување ќе биде во можност да се грижи за идните пензионери.
Кога ќе се земе предвид возраста на испитаниците, интересно е дека младите од 15 до 34 години покажуваат поголемо ниво на доверба во иднината на пензискиот систем од постарите граѓани.
Граѓан(к)ите се со различни ставови за тоа кои се настаните што ќе ја одбележат 2017-та година.
Излезот од политичката криза е главен настан за 31,8 % од испитаниците, а за 19,8% тоа ќе бидат локалните избори. Првите судења за обвиненијата од Специјалното јавно обвинителство ќе ја одбележат годинава според 15,8% од испитаниците.
Во однос на релацијата САД – Македонија, една третина од граѓаните (37,3%) сметаат дека претседателот Доналд Трамп, ќе влијае позитивно врз Македонија, додека 20,4 % сметаат дека неговото влијание врз Македонија ќе биде негативно. Доколку ова прашање се разгледува низ етничката припадност на испитаниците, може да се забележи дека 39,9% од етничките Македонци веруваат дека Трамп позитивно ќе влијае, наспроти 38,3% од етничките Албанци, кои сметаат дека неговото влијание ќе биде негативно.
Анкетата е спроведена во текот на февруари на 1.000 испитаници како национален репрезентативен примерок.
