Министерството за труд и социјална политика денеска организираше состанок на работната група со претставници на Обединетите нации и на Европската унија, за дефинирање на Акцискиот план за итни мерки за подобрување на состојбите во Специјалниот завод во Демир Капија. На средбата детално се разгледаа сите мерки од Акцискиот план кои се однесуваат на подобрување на состојбите во Заводот, подобрување на условите за престој на корисниците, преку почитување на основните човекови права, зголемување на нивната мобилност, пристап во работата со крајните корисници, како и идните чекори во оваа насока.
„Договорена е забрана за нови сместувања во институциите кои згрижуваат деца/лица со попреченост (која е веќе на сила). Во текот на наредните две недели, центрите за социјална работа треба да направат индивидуална проценка на сите деца кои се сместени во институциите и да подготват индивидуален план за секое дете. Ќе се поддржи отворање на мал групен дом за децата кои се сместени во Демир Капија, во насока на нивно деинституционализирање. Исто така, ќе се организираат работни средби на меѓународните агенции, ЕУ и МТСП на техничко ниво, со цел да се операционализираат сите активности и да се поделат улогите во процесот, а ќе се организира и донаторска конференција за Специјалниот завод – Демир Капија“, соопштуваат од МТСП.
Отаму додаваат дека ќe се поддржи регионална соработка со државите и со стручните лица од институциите од балканскиот регион и дека се отворени за волонтерски тимови од граѓанскиот сектор кои ќе помогнат во работењето и подигнувањето на стручните капацитети на Специјалниот завод – Демир Капија.
„Ќе се овозможат тренинзи за стручните лица кои работат во Специјалниот завод, а кои се однесуваат на подготовка на планови за трансформација и за обезбедување на услуги во локалната заедница и итно подобрување на хигиенските услови и здравствената нега во установата“, потенцираат од МТСП.
На состанокот со кој раководеше министерката за труд и социјална политика, Мила Царовска, учествуваа координаторот на ОН во Македонија и постојан претставник на УНДП, Луиза Винтон, постојаниот претставник на УНИЦЕФ за Македонија, Бенџамин Перкс, претставникот на Делегацијата на ЕУ, Нафи Сарачини, Уранија Пировска од Хелсиншкиот комитет за човекови права и претставникот на проектот финансиран од Делегацијата на ЕУ во Скопје, Владимир Крстевски.
