„Првин, да го земеме предвид насловот на конференцијата: Како до Европа?. Има два одговори, Прво, ова е дел од Европа без сомнение. Второ, фактот дека ние сме веќе во Европа, треба да се формализира, односно истера оној институционален процес низ преговорите, на реформите и на крајот да се биде дел од членките на ЕУ и НАТО… Се разбира добро е да се учи од сите нас, особено од Хрватска, Словенија и други земји што структурно се слични и блиски со Македонија“, изјави Н.Е. Амбасадорот на Република Словенија, Милан Јазбек.
На конференцијата Македонски перспективи: Како до Европа? во организација на ЦИВИЛ и МЦМС, Јазбек истакна дека е многу важно за целиот балкански регион започнување на процесот за евроинтеграциите и влез во НАТО на Македонија и дека е добро да се учи од сите земји, особено во регионот што поминале низ истиот процес.
„Македонија конечно е дел од процесот за влез во ЕУ што навистина е многу важно… Земја што беше дел од проблемот, сега е дел од решението и една водечка сила за промените на Балканот и на тој начин се испраќа сигнал кон останатиот Балкан за да го следи истиот пример…
Според нашето искуство, не смее да се чека, туку веднаш да се прави она што е потребно за да биде полесен целиот процес. Исто така е важно високите претставници , претставниците на средното раководство на Владата и јавната администрација да им го објаснат процесот на луѓето. Затоа што обичниот граѓанин ќе има чувство дека и тој ќе може да влијае и да придонесе. Тоа е многу важно затоа што на крајот поважни се импресиите од бројките“, изјави Јазбек истакнувајќи ја важноста од граѓанското учество во самите процеси на одлучување.
„Кога станува збор за ЕУ, станува збор за една огромна структурална промена, докажана и која вреди да се направи, особено ако се чека, колку што вашата земја чекаше… Нормално дека секогаш ќе постојат одредени сомнежи, но доколку имаме конкретни одговори ќе се добие посакуваниот резултат.
Ние имавме референдум за членство во НАТО, некако граѓанското општество не поттикна на тоа, но и опозицијата која исто така сакаше да има референдум за влез во ЕУ, па се одлучи да биде и за ЕУ и за НАТО. Поддршката за НАТО беше многу висока, 68%, а за ЕУ се разбира беше околу 90 %“, рече Јазбек, пренесувајќи го искуството од Словенија, упатувајќи за преизвиците со кои тие се соочиле.
Конференцијата е дел од проектот „Слободни медиуми за слободно општество“ што ЦИВИЛ го спроведува со поддршка на Федералното министерство за надворешни работи на Сојузна Република Германија.
Биљана Јордановска
Камера: Атанас Петровски
