Според анализа на лондонски The Independent, обидите на Доналд Трамп да се извлече од конфликтот што самиот го ескалираше наидуваат на тврд отпор од Техеран, кој во меѓувреме засилува напади низ Персискиот Залив и ги отфрла дипломатските сигнали од Вашингтон.
И покрај предложениот мировен план од 15 точки и најавите за можни разговори (со посредство и на Пакистан), иранското раководство гледа стратешка предност во продолжување на притисокот. Трамп, според анализата, сака да излезе од војната, додека Израел смета дека целите сè уште не се постигнати.
Во текстот се потсетува дека Иран со децении игра улога на дестабилизирачки фактор во регионот, но глобалната перцепција сè повеќе ја префрла одговорноста за војната врз САД и Израел. Германскиот претседател Франк-Валтер Штајнмаер ја оцени војната како „политички катастрофална грешка“ и спротивна на меѓународното право.
Во меѓувреме, противречните изјави на Трамп – од тврдења дека иранската нуклеарна и воена моќ е „уништена“, до нови закани – дополнително ја поткопуваат довербата кај сојузниците. Европски и воени претставници предупредуваат дека непредвидливоста на Вашингтон има директни безбедносни последици.
На теренот, судирот продолжува да ескалира. Иран напаѓа цели во регионот, додека САД и Израел вршат удари врз иранска територија. Особено загрижува можноста за долгорочно затворање на Ормутскиот теснец, низ кој минува околу една петтина од светската нафта и гас, како и значителен дел од ѓубривата – што веќе предизвикува скок на цените и ризици за глобалната економија и прехранбената безбедност.
Според The Independent, целите на САД остануваат нејасни – од промена на режим до запирање на нуклеарната програма – додека Иран бара спротивното: задржување на нуклеарниот капацитет и повлекување на американските сили од регионот. Во таков контекст, Трамп се соочува со растечки притисок дома и во странство, додека сè појасно се гледа неговата намера да се дистанцира од конфликтот што самиот го продлабочи.
Извор: The Independent
