Група истакнати интелектуалци и универзитетски професори, испрати отворено писмо до Европската комисија и до Конгресот на САД, како реакција на медиумскиот линч и на политичката хајка против западните дипломати во Скопје.
„Нашата основна цел е да ја искажеме решеноста за одлучна одбрана на принципите на парламентарната демократија, врз кои е фундирана нашата држава од нејзиното конституирање во 1991 и кои постепено во 11-годишното владеење на кликата на г-дин Никола Груевски прерасна во автократски режим на хибриден политички систем“ стои во отвореното писмо на македонските интелектуалци.
Потписниците велат дека се против ставањето под знак прашалник на стратешките евро-атлантски ориентации на земјата кои ги третираат како највисоки вредности. Тие истакнуваат дека не се согласуваат со нападите и навредите врз дипломатите на земјите-сојузнички на Македонија, членки на НАТО и на ЕУ кои несебично помагаат во реформите на Македонија, на патот кон изградбата на либералната функционална демократија.
„Во исто време, за нас е збунувачки епилогот од средбата на лидерот на партијата ВМРО-ДПМНЕ со рускиот амбасадор во Македонија, каде на многу фин начин и со префинет дипломатски речник, се опишува текот на разговорите и се возвишува духот на пријателството и заемното почитување меѓу Скопје и Москва.
Уште повеќе сме збунети од брзата реакција на руското МНР, кое без познавање на состојбата во Република Македонија, ги обвини западните држави за некакво мешање во внатрешните работи и дестабилизација на Република Македонија“, велат универзитетските професори.
Потписници на Отвореното писмо се универзитетските професори, д-р Милчо Пановски, д-р Осман Кадриу, д-р Љубомир Фрчкоски, поранешен министер за надворешни работи, д-р Мерсел Биљали, поранешен советник на премиер, д-р Нано Ружин, поранешен амбасадор во НАТО, д-р Јове Кекеновски, д-р Сабахудин Жута, д-р Борче Давитковски, д-р Земри Елези, поранешен генерален секретар на Собранието, д-р Ѓорѓи Спасов, поранешен амбасадор и министер за правда, д-р Ремзи Изаири, д-р Љупчо Ристоски, д-р Мерсим Максути, д-р Ѓорѓи Тоновски, д-р Аурора Карамети, д-р Ибиш Кадриу, д-р Митасин Беќири, д-р Самоил Малчески, политички аналитичар, д-р Али Муслиу, и Исмет Рамадани, претседател на Атлантскиот совет, Висар Адеми, политички аналитичар, Ване Цветанов ексдиректор на Управата за спречување на перење пари и Џенур Исеини, политички аналитичар.