Пратениците во Собранието пред два дена со 61 гласа „за“, без ниту еден глас „против“ и без „воздржани“, го поддржаа предлог-законот за попис на населението, домаќинствата и становите во прво читање, со што тој ја продолжува собраниската процедура.
За него не се изјасни опозицијата која претходно ја напушти салата.
Предлог-законот за попис беше поднесен во мандатот на претходната влада на СДСМ и ДУИ, но беше заглавен година и половина поради несогласувањата меѓу партиите. Пописот треба да започне на 1 април следната година, а ќе го спроведува Државниот завод за статистика.
ЦИВИЛ организираше панел дискусија на тема „Попис: Помеѓу политиките и статистиките“, со строго придржување кон протоколите за заштита од Ковид-19, а учесници на панелот беа Дончо Герасимовски, поранешен директор на Државниот завод за статистика, Апостол Симовски, актуелниот директор на Заводот за државна статистика, и Џабир Дерала од ЦИВИЛ.
Апостол Симовски, актуелниот директор на Заводот за државна статистика истакна дека подготовките за пописот започнале одамна и дека попис не се прави за краток период од месец дена или година дена, туку дека треба подолго време.
„Подоготвките почнаа одамна, попис не се прави за месец или два или година дена, треба подолго време, се разбира врз основа на сознанијата, искуствата и потребите за овие информации она што ја кочи е законот, вчера почна расправата, вчера беше првото читање и во наредниот период ги очекуваме деталите, се надевам дека субјектите во парламентот ќе го изгласаат овој закон и нема да има никакви спротивности, оваа е операција која треба да донесе бенефит на граѓаните во државата. Ние финишираме со подготовките од технички аспект, овој попис ќе биде специфичен нема да биде на оној традиционален начин ќе користиме комбиниран метод“, истакна Симовски.
Симовски додаде дека за разлика од претходните години, оваа година ќе има електронски прашалници, на лаптопи и ќе има комуникација со автоматски бази од каде ќе се превземаат податоците и ќе се надополнуваат од терен.
Според Дончо Герасимовски, поранешен директор на Државниот завод за статистика, новиот начин на кој ќе се спроведе пописот е новост за државата и дека Државниот завод за статистика се труди да придонесе високи резултати за да се добијат податоци што побрзо.
„Условите и можностите иако активностите Заводот ги започна пред неколку години, сега со пандемијата се успори процесот, но институциите функционираат меѓу себе со координации. Јас сум изненаден што учестувам во тие консулатации и што ќе направивме исчекор од друг систем“, вели Герасимовски.
Герасимовски очекува дека ќе се постигне современо работење и дека брзо ќе се добијат потребните податоци.
„Во пописот многу е важно како се вршат подготовките за организацијата и како се спроведуваат податоците на терен. Ќе биде се најдобро ако ние сме послушни и ги почитуваме законите, а квалитетот на податоците ќе ги задоволат потребите на држaвата“, вели Герасимовски.
Џабир Дерала од ЦИВИЛ изјави дека повеќе од една деценија имаме политики кои го контаминираат политичкиот дискурс, односно дека не може ни едно прашање да помине, а да не се исполитизира.
„Пописот може многу лесно да се претвори во оружје со кое се дискредитираат политичките противници. Тоа е една од главните поенти на голем дел на политичарите на десничарка групација во земјата и тука имаме ситуација каде етничките односи стануваат главна тема во сите области“, вели Дерала.
Според него, политичката фела го зима во рацете како аргумент за да покаже дека онаа другата страна е попустлива.
„Се работи за калкулација на тие структури кои може и да не ја постигнат својата целона атмосфера во која граѓаните имаат се помалку доверба во институциите, едноставно креирање на теории на заговор е доволно добар резултат за нив, бидејќи ќе се вклопи во нивната стратегија и во која профитот секако го извлекуваат малкумина во тие структури“, вели Дерала.
Претседателот Стево Пендаровски во годишното обраќање од собраниската говорница апелираше во текстот на Законот за попис да се вградат сите највисоки статистички стандарди на Еуростат и сите конструктивни предлози на опозицијата, за да се добиее валидни резултати чија кредибилност нема никој да ја оспорува.
„Уверен сум дека високите политички тензии околу овој, за државата, стратешки важен потфат, во голема мерка би биле намалени доколку сите политички субјекти јавно ја образложат својата цел која очекуваат да биде постигната со донесување на законот: дали добивање на прецизни статистички податоци врз чија што основа ќе може да формулираме долгорочни политики и стратегии во виталните области или политизација на резултатите од пописот заради оспорување на статусот на етничките заедници“, истакна Пендаровски.
А. П.
