Поддржувачите на идејата „За заедничка Македонија“, продолжуваат со обидите да го зголемат бројот на демонстранти со притисок, злоупотреба, манипулација, режирани сцени и уцени на студентите. И, што е уште позагрижувачки, тие механизми ги применуваат и врз малолетници од средните и основните училишта!?
До ЦИВИЛ – Центар за слобода пристигнаа голем број пријави од загрижени студенти, ученици и родители кои се револтирани од притисокот и манипулациите што се вршат врз нив и нивните деца.
Фотографии од натписи по средни училишта во Скопје – „Не сакаме нашите деца да живеат во федерална држава“ се објавени на провладините портали, каде што со гордост се покажува дека малолетни средношколци учат во училишта што испраќаат пораки за поделеност и меѓуетнички тензии.
Притисоците што најмногу загрижуваат се оние што се пренесуваат и во основните училишта. ЦИВИЛ Медиа, објави текст за основното училиште „Димитар Македонски“ од Скопје каде што ученици носат самолепливи етикети со „пари“ на кои има албански ознаки и ги лепат насекаде низ училиштето. Пријавата пристигна од загрижена граѓанка од Општина Аеродром.
Редакцијата на ЦИВИЛ Медиа, разговараше со директорката Зорица Поповска, според која, нема залепени „пари“ во училиштето, но како што ни изјави, таа не може да проверува кој што носи во своите училишни ранци. Поповска, цврсто стои на ставот дека политиката треба да е настрана од училиштата.
ЦИВИЛ Медиа објави дека во студентските домови „Кузман Јосифовски Питу“ и „Пелагонија“, на 28 февруари, ден пред првиот протест на кој се приклучија и студентите, од врата на врата, на студентите им се делеле материјали сокои тие се повикуваат на поддршка на протестите против двојазичност. И преку СМС-пораки од Унијата на млади сили на ВМРО-ДПМЕ се мобилизираа студентите да се појават на протест.
Следниот ден, средното техничко училиште „Ѓорги Наумов“ од Битола, беше првото, каде што, како што вели анонимниот извор на ЦИВИЛ, под притисок на вработени од редовите на Унијата на млади сили од ВМРО-ДПМНЕ, со испраќање на пораки биле поттикнати ученици, меѓу кои и малолетници, да ја прекинат наставата како знак на револт за наводната идеја за двојазичност. Ден подоцна, на бојкотот на наставата се приклучија и битолските средношколци од училиштето „Таки Даскалот“.
И средношколците од скопската гимназијата „Јосип Броз Тито“, вчера беа жртви на манипулација од организаторите на „За заедничка Македонија“. Преку соопштение им било наредено да излезат од училиштето – за провладините портали да ги снимат средношколците како наводно, се приклучуваат кон протестот.
ЦИВИЛ – Центар за слобода постојано упатува критики, го осудува за секој обид да се злоупотребуваат малолетници и апелира учениците да останат надвор од дневните политики и манипулации на власта.
Во предизборниот период, кога неретко малолетници беа користени во изборни кампањи, ЦИВИЛ постојано укажуваше и објавуваше пријави од вознемирени граѓани и граѓанки и во своите соопштенија ги повикуваше надлежните институции да реагираат и да ги санкционираат сите злоупотреби со деца.
По завршувањето на изборите, актуелните протести повторно ги активираа сите средства со кои се користи владејачката партија, кои уште еднаш се најгласно осудени од ЦИВИЛ. Во денешното соопштение се вели:
„Индоктринацијата и злоупотребата на малолетници за спроведување акти на политичко насилство се крајно неприфатливи. Инспираторите на насилството во изминатите неколку дена мора веднаш да се повикаат на одговорност.Ги повикуваме институциите, пред сè, полицијата и обвинителството, веднаш да преземат законски мерки и да го спречат насилството“.
