Известители од Комисијата за почитување на обврските и заложбите кои ги преземаат земјите-членки при приемот во Советот на Европа, во текот на денешниот ден и утре ќе бидат во работна посета на Република Македонија.
Европратениците Лисе Кристоферсен од Норвешка и Валериу Гилечи од Романија кои се дел од делегацијата како коизвестувачи на Парламентарното собрание на Совет на Европа (ПССЕ), според најавата, треба да се сретнат со претседателот Ѓорге Иванов, со претседателот на Уставниот суд, со владини претставници, со лидери на политички групи и со Специјалниот јавен обвинител, како и со претставници на граѓанскиот сектор, меѓу кои и ЦИВИЛ-Центар за слобода, медиуми и меѓународни организации.
Како што најавија од ПССЕ, теми на работната посета на известувачите ќе бидат настаните кои следуваат по парламентарните избори во декември 2016 година, како и генералниот напредок во однос на обврските и заложбите од Советот на Европа.
Делегација на ПССЕ минатата година двапати ја посети Македонија. Тимот предводен од Кристоферсен и Гилечи во февруари 2016 ја поздрави одлуката за спроведување на предвремени парламентарни избори и изразија поддршка за работата на Специјалното јавно обвинителство.
Во април минатата година, при посетата на делегацијата предводена од Стефан Шенах од Австрија, ПССЕ изрази загриженост за влошувањето на политичката состојба во Македонија, откако Иванов донесе одлука да аболицира 56 лица. Тие го поддржаа начинот како се организираа протестите на Шарената револуција, на кои, како што истакнаа во заклучокот од посетата, не беа евидентирани посериозни судири и насилство.
М. Теговска
