Претседателот на Собранието, Талат Џафери, го потпиша решението за распишување на избори за членови на советите на општините и Советот на Град Скопје и ја извести Државната изборна комисија.
ДИК соопшти дека е известена за потпишаното Решение за распишување на локалните избори и дека очекува документот да и биде доставен и да биде објавен во Службен весник на Република Македонија.
„По објавувањето на Актот за распишување на локалните избори во Службен весник, Државната изборна комисија ќе одржи седница на која ќе биде усвоен Календар – роковник со кој ќе бидат утврдени изборните активности и роковите за нивно спроведување, по што ќе започне спроведувањето на локалните избори“, соопшти ДИК. Оттаму најавија и дека јавноста навремено ќе биде информирана за преземање на сите активности за организирање и спроведување на изборите.
Претседателот на Собранието, Талат Џафери по потпишувањето на Решението за распишување на локалните избори, кои треба да се одржат на 15 октомври, изјави:
„Апелирам со сите учесници во изборниот процес да се однесуваат во согласност со Уставот и законите, а надлежните институции да се погрижат денот на изборите да протече во мирна, демократска и фер атмосфера, како што заслужуваат граѓаните“, рече Џафери
Кампањата почнува 20 дена пред изборите на 25 септември, а Собранието во тој период ќе работи, но нема да има пленарни седници, рече Џафери, за за се избегне претворањето на седниците во дел од изборната кампања.
Од ДИК веќе работат на подготовка за локалните избори, но квалитетот на нивното спроведување сè уште е неизвесен.
ЦИВИЛ – Центар за слобода за следната недела најави дека ќе излезе со дополнителни препораки и извештаи што посочуваат дека изборните процеси, вклучително и престојните локални избори, ги следат сериозни проблеми, особено со непрочистениот Избирачкиот список.
На изборите, ќе се бира градоначалник на Град Скопје, градоначалници на општините, како и членови на општинските совети. Се очекува политичките партии да излезат со официјалните листи на кандидати за градоначалници и советници на локалните избори.
