Името и влезот во ЕУ и НАТО сè уште остануваат актуелни во јавноста. Но, она што ќе остане во фокусот наредните денови е реконструкција на Владата.
И покрај грижата како ќе се покажат новите министри, чии имиња се веќе познати во јавноста, останува отворено прашањето колку тоа ќе влијае на состојбата во Собранието и дали ќе се менува драстично парламентарното мнозинство со вклучување на Беса на Африм Гаши заедно со троица пратеници.
Ставот на граѓанките и граѓаните околу промените во Влада е дека тие се добри, но дел од нив под добри промени подразбираат смена на сите функционери во Влада. На прашањето на ЦИВИЛ Медиа што би промениле во Владата, еден од граѓаните одговори: „Одма Владата би ја сменил, за 24 часа. Не ми се допаѓа оваа Влада. Добро е да има промени, уште една промена да има, па каква таква“.
„Треба да има јасна дистинкција дека стартот на преговори не е исто што и пристапувањето во ЕУ. Ова треба да биде признаено. Има два до три изборни циклуси помеѓу двата настани, а пристапувањето е алатка што е тука да ги помогне реформите. Ако го барате истото ниво на демократска зрелост како онаа што се бара за влез во ЕУ тогаш процесот нема смисла. Имаме искуства со земји што почнале преговори, а потоа се најдоа блокирани. Нема автоматизам. Секогаш кога се политизира овој процес тој не успева“, е дел од изјавата на Никола Димитров, министер за надворешни работи од Брисел по прашањата за преговорите со името и поврзаноста со интерграцијата на државата во ЕУ и НАТО.
Новото рочиште во случајот „Траекторија“ на СЈО започна со слушање на „бомбите“. Во предметот „Траекторија“ обвинети се Никола Груевски, Миле јанакиевски и Љупчо Георгиевски, поранешен директор на државни патишта, за изградбата на автопатските делници Миладиновци-Штип и Кичево -Охрид.
И не заборавајте, утре ЦИВИЛ промовира три книги со повеќе од 350 колумни, на вкупно 1.000 страници во клубот Сити Хол (до МКЦ), со почеток во 20:30 часот. „Во чекалницата на слободата” од Сашо Орданоски, на 440 страници, “Рафал” од Џабир Дерала и “Неправда и немир” од дваесетина авторки и автори на ЦИВИЛ, со по 280 страници, ќе овековечат еден тежок и неизвесен период за Македонија.
Биљана Јордановска
