Основното јавно обвинителство и Министерството за внатрешни работи, осумнаесет дена по насилствата во Собранието и пронаоѓањето на импровизирана експлозивна направа, сè уште не излегоа со официјален став и детали околу истрагата.
Ексминистерката Фросина Ташевска Ременски денеска ги обвини ОЈО и МВР дека сè до денес, не пројавиле адекватен интерес и активности за вистинската квалификација на чинот на поставување на експлозивна направа во Собранието, како објект од витално значење, што според неа, е доказ плус дека станува збор за акт на тероризам. „Несериозноста оди до таму што ОЈО по смешната квалификација на насилствата како ‘учество во толпа’ во витален објект, може да каже дека, толпата ја внела ‘импровизираната експлозивна направа’“, смета Ременски.
Таа потсетува и дека поставувањето на експлозивот е регистирано од безбедносните камери во Собранието, и дека, според објавените снимки во медиумите, се работи за вработен во истото. Но, единствен став што досега излезе од Министерството за внатрешни работи е дека „експлозивната направа“ е предадена за натамошна постапка и се работи на расчистување на случајот.
ЦИВИЛ Медиа се обрати до МВР со прашање за тоа до каде е постапката, но до објавувањето на овој текст не добивме никаков одговор. Телефонските броеви на Основното јавно обвинителство не се во функција, па нашите прашања ќе ги испратиме по пошта.
Ременски, исто така, потсетува на 31 јануари 2017, кога по анонимна пријава за поставена бомба во Собранието, Одделот за антитероризам и деминирање при УБК, извршил проверки во внатрешноста и надворешноста на зградата на Собранието, а МВР по проверките, соопштило дека не е пронајдена никаква експлозивна направа.
„Да се присетиме дека, во 2007 и 2014 година, гранатирањето на објектот на Владата на Република Македонија, исто така, објект од витално значење, беше оквалификувано како терористички напад“, вели Ременски.
