„Веќе две години, херојството и борбеноста на украинската нација го инспирираат слободниот свет односно светот во кој доминираат демократијата и почитувањето на човековите права и слободата. Украина, со својата храброст, со татковинската љубов и за жал со многуте човечки жртви во изминатите две години, претставува светски и историски пример колку е важен, но истовремено и колку е скап, стремежот за слобода, за солидарност и обединување“, изјави вицепремиерот за европски прашања, Бојан Маричиќ, на мултимедијалната конференција „Украина – две години хероизам“, во организација на Амбасадата на Украина во соработка со ЦИВИЛ.
„Не постои поинаков и поисправен одговор за бруталната воена агресија што ја спроведува тиранијата на Путин, од оној што Украина го дава веќе две години, со поддршка од демократските земји во светот. Рускиот напад врз Украина е напад врз европските вредности и затоа за нас беше едноставен и морален избор да избереме страна и меѓу првите, без задршки и калкулации 100% да се усогласиме со безбдносната и надворешната политика на Европската Унија и НАТО“, додаде Маричиќ.
„Северна Македонија е уште еден пример за важноста да се биде во сојуз како што е НАТО, но истовремено е пример дека нема мали и големи држави, туку има земји и народи кои ги негуваат солидарноста и сојузништвото и ги покажуваат на дело. Македонската нација, од првиот ден, застана заедно со украинската нација и со сите други сојузници во НАТО и во ЕУ, во борбата против агресијата, воените злосторства и непочитувањето на човековото достоинство и меѓународното право“, истакна Маричиќ.
Маричиќ потенцираше дека поддршката за Украина против рускиот напад не може и не смее да се гледа како трошок, туку инвестиција во иднината на една голема и храбра нација, но и инвестиција во нашата сопствена безбедност, стабилност и мир.
„Со отворањето на можностите за забрзана интеграција на Северна Македонија и Албанија, со кандидатскиот статус и почетокот на преговорите со Украина и Молдавија и со отворањето на европската перспектица за Грузија, ЕУ покажува дека не е само економски сојуз, туку е сојуз на држави и нации кои споделуваат исти вредности – вредности на мирот, демократијата, солидарноста и меѓусебното почитување. Војната во Украина е момент на пресвртница во историјата, како што кажа и германскиот премиер Олаф Шолц, и претставува доказ дека немаме време, ниту можности за колебање, како во поглед на евроатлантските интеграции, така и во поглед на целосната и безрезервна поддршка на украинската нација во нејзините стремежи за слобода, сувереност и независност“, истакна Маричиќ.
„Македонскиот народ останува заедно со украинскиот народ на патот до мирот, безбедноста, демократијата и членството во ЕУ. Заедно се бориме, заедно и ќе успееме. Знаеме колку е тешка оваа битка, но знаеме дека сме на вистинската страна и дека на крајот ќе завршиме заедно како победници“, вели тој во своето обраќање.
Б. Ј.
камера: Атанас Петровски
монтажа: Ариан Мехмети
фотографија: Б. Јордановска
