Продемократските протести продолжуваат и денеска (вторник, 19 април) во Скопје, во истото време – 18,00 часот и на иста локација – пред Специјалното јавно обвинителство, во знак на поддршка на институцијата од која граѓаните очекуваат враќање на правната држава.
Барањата на демонстрантите денеска се надополнети со четири нови и тоа: Произнесување на Уставниот суд за уставноста на СЈО; Формирање на специјално одделение на Кривичниот суд, кое ќе биде надлежно за случаите под јурисдикција на СЈО; Задолжително вклучување и присуство на независни претставници на граѓанското општество во процесот на решавање на кризата и формирање преодна влада која докрај ќе ги имплементира итните реформски приоритети од извештајот на Прибе.
Продолжување на листата со барања е резултат на најавата дека во петок во Виена ќе се одржи средба со лидерите на четирите најголеми партии во Македонија со европските претставници
И попладнево и вечерва, тимовите на ЦИВИЛ ќе бидат меѓу демонстрантите и редовно ќе известуваат за случувањата на улиците на Скопје.
Покрај протестите во Скопје, Битола, Велес, Куманово, Струмица и Штип, денеска за прв пат ќе се протестира во Прилеп и Кочани.
Набљудувачките тимови на ЦИВИЛ како и во изминатите денови и денеска ќе известуваат за протестите низ целата земја.
Марија Теговска
