Во денови кога екстремизмот, расизмот и национализмот добиваат жестоки осуди во целиот свет, опозициската ВМРО-ДПМНЕ сè повеќе ги изразува своите ксенофобични ставови, со цел да предизвика паника и страв меѓу граѓанките и граѓаните пред локалните избори.
Овој пат на Фејсбук групата Аеродром во моето срце е објавена фотографија од бегалци, со текст дека СДСМ по преземањето на локалната власт во Општината, на нејзината територија планира изградба на бегалски камп!
Јасмина Голубовска, од невладината организација „Легис“ за ЦИВИЛ Медиа изјави дека последните случувања во врска со бегалската криза и зголемената ксенофобија и страв кај населението, ги предизвикува опозициската партија ВМРО-ДПМНЕ, со тоа што започна активна кампања пред локалните избори, да ги злоупотреби бегалците како предмет за манипулација со граѓаните.
„Пред сè, станува збор за населби, каде за жал, постои поголема концентрираност на омраза, без разлика дали станува збор за бегалската криза која што се актуелизира од ВМРО-ДПМНЕ, или пак, станува збор за етнички прашања во државата, некако секогаш, населбата ‘Аеродром’ била место каде се ширеле страв, ксенофобија, омраза и насилство, заради непроверени информации коишто ги шири оваа партија. Тоа започна со собраниската седница којашто ја организираше Влатко Ѓорчев, пред недела и половина, која ја искористи како шанса да разговара за нешто што нема никаква правна важност, ниту пак е во сила, ниту пак е усвоено, односно се разгледува од невладините организации, на предлог на Министерството за труд и социјална работа“, вели Голубовска.
Според неа, она што недостасува е казна за ваквото однесување на парламентарците, кои не само што ја злоупотребуваат својата функција како пратеници и претставници на граѓаните, туку и самите комисии каде што имаат функција на претседател, како што е случајот со Ѓорчев и Комисијата за труд и социјална политика,
„Пред сè, го повикувам претседателот на Собранието, Талат Џафери, да преземе мерки за прекршувањето на Деловникот по овие прашања, како и злоупотребата на овие теми во парламентарниот дом. Што се однесува до јавноста, ги замолувам да останат трезвени и побудно да ги следат овие информации, затоа што следуваат локалните избори, а бегалците очигледно, за една политичка партија, во случајов, ВМРО-ДПМНЕ, ќе бидат обид за дефокусирање“, изјави Голубовска.
Минатата недела, ваква пропаганда ширеше и Унијата на млади сили на ВМРО-ДПМНЕ во Штип, која на својата Фејсбук страница објави фотомонтажа на деца-мигранти во муслиманска облека и девојчиња со шамии, а над фотографијата испишан текст: „Еден училишен ден по доселување на мигранти. Ќе дозволиш ли вака да изгледа идното образование“.
ЦИВИЛ – Центар за слобода жестоко го осудува секој израз на говор на омраза, национализам, расизам и ксенофобија и ги повикува институциите решително да се справат со ваквите екстремистички групи.
Истовремено, ЦИВИЛ ги повикува граѓанките и граѓаните да не наседнуваат на ваквата националистичка пропаганда на ВМРО-ДПМНЕ и информациите кои доаѓаат во врска со мигрантите и бегалската криза, да ги примаат со оргомна резерва и трезвеност.
ЦИВИЛ Медиа, денеска, излезе на улиците низ Скопје и разговараше со граѓанките и граѓаните за бегалците.
На прашањето дали се плашат од бегалците тие велат дека „и бегалците се луѓе, избегани од маки…“. Еден од соговорниците вели: „Бегалците и албанската Платформа се само реклама на опозицијата, сè е тоа лук и вода, каде е сега албанската Платформа? Тоа се само игри без граници на опозицијата, за да го плашат народот пред локалните избори, за да можат да нè мафтосуваат и да крадат!“
Маја Ивановска
