„Македонија беше во една длабока политичка криза, имавме срозани институции, демократијата беше во слободен пад, имаше големи и страшни проблеми со владеењето на правото, селективна правда, нарачани апсења и политички процеси, голема злоупотреба на полицијата и безбедносните служби, и генерално имавме многу лоши односи со нашите соседи. Сега една година подоцна, успеавме да склучиме лани договор со Бугарија, и откако е потпишан договорот, трговијата помеѓу Македонија и Бугарија е порасната за 12 проценти. И не само тоа, Бугарија нè стави високо на агендата на ЕУ интеграциите и имаме силна поддршка“ вели Дане Талески, претставник од Влада на Република Македонија.
За склучениот договор со Грција, Талески рече дека отвора една нова перспектива за државата и дека ќе се исполнат двете најважни стратешки цели во надворешната политика.
„Тие две најважни стратешки цели беа утврдени уште од почетокот на 90-ите години, со едногласна усвоена декларација во Собранието, од страна на сите политички партии, за тие две стратешки цели постои апсолутен политички, надпартиски и етнички консезус. Договорот кој го склучивме со Грција, овозможува тие две стратешки цели да се исполнат, Европскиот Совет даде една јасна одлука, комесарот Хан доаѓа на 17 јули и го почнуваме процесот со преговори“, додава Талески.
„Македонија во овој момент е држава на пат да нема отворени прашања со своите соседи, и тоа е единствена држава на Балканот што може да го каже тоа“, вели Талески.
Талески додава дека сето ова помага државата да оди напред во евроинтеграциските процеси, дека за нас се важни од два аспекти. Прво, за консулидација за реформите дома, како зајакнувањето на владеењето на правото и темелна реформа на безбедносните служби, но и средување на состојбата во јавната администрација, слободните медиуми, но сепак најважно за граѓаните е што процесот на евроинтеграциските процеси значи економски подобрувања.
„Во Република Македонија започнавме од ситуација на заробена држава, имаме ситуација кога демократијата повторно е вратена, кога институциите нормално функционираат, меѓуетничките односи се релаксирани, Владата е посветена на концептот на едно општество“, вели Талески.
Конференцијата е дел од проектот „Слободни медиуми за слободно општество“ што ЦИВИЛ го спроведува со поддршка на Федералното министерство за надворешни работи на Сојузна Република Германија.
Ангела Петровска
камера: Атанас Петровски
монтажа и фотографија: Биљана Јордановска
