Во Собранието денеска продолжува расправата за Предлогот за пристапување кон уставни измени за имплементирање на Договорот од Преспа, меѓу Македонија и Грција, предложен од Владата.
Ова е трет ден од расправата за предлогот, и според информациите од Собранието гласањето ќе се случи во петок.
Во текот на вчерашната седница, премиерот Зоран Заев изјави дека е подготвен да разговара со опозицијата за да се дојде до консензус.
„Сега само се утврдува потреба за отпочнување на уставни амандмани, ќе има понатаму гласање за нацртот, ќе имаме двотретинско гласање за уставните амандмани. Тоа е процес којшто ќе трае повеќе од 100 дена. Затоа уште еднаш како прв во извршната власт кажувам спремен сум да седнам со сите вклучитело и со лидерот на ВМРО-ДПМНЕ за да можеме да изградиме сценарио и консензус по ова прашање“, изјави Заев од говорницата во Собранието.
Пратеникот од ВМРО-ДПМНЕ, Крсто Јовановски, му предложи на Заев лидерите на двете најголеми македонски партии да седнат на маса и да донесат решение за иднината на државата, на што премиерот одговори дека е подготвен за средба, а додека Мицкоски порача дека со премиерот можат само да констатираат дека договорот е мртов.
Јулијана Николова, пратеничка од ЛДП, истакна дека одговорноста е на пратениците и дека сите заедно треба да застанат зад одлуката за НАТО и ЕУ, и според неа најголем проблем на пратениците од опозицијата е партискиот став на ВМРО-ДПМНЕ да не се поддржат уставните измени со цел промена на уставното име.
Бранко Манојлоски, од ДУИ, предложи на секој, како што кажа, вмровец кој ќе гласа за договорот државата да стои зад него, ама прво да гласа и да се амнестираат сите грешници.
Претседателот на опозициската ВМРО-ДПМНЕ, Христијан Мицкоски, вчера испрати барање до Собранието во кое бара да зборува пред пратениците за предложените уставни измени, но барањето го отфрли претседателот на Собранието, Талат Џафери, велејќи дека не постои деловничка основа за лидер на партија кој не е пратеник да се обрати од собраниската говорница
Но барањето на Мицкоски е одбиено и поради тоа што писменото барање било адресирано до господин Џафери, а не до Претседателот на Собранието Џафери.
Сообраќајот на булеварот пред Собранието повторно беше затворен, поради протест против уставните измени на помала група на граѓани.
А. Петровска
