Вицепремиерот Кочо Анѓушев, на бизнис-форум во Ерусалим, пред педесетина претставници на компании од Македонија и Израел ги презентираше мерките за економски развој, што ќе ги имплементира новата Влада, а коишто ги подели на три столба.
„Првиот столб се мерките за поддршка на инвеститорите, вториот е за изградба на соодветна инфраструктура, со цел подобро поврзување со соседните земји, а третиот столб се реформите во енергетскиот сектор“, рече Анѓушев.
Тој потенцираше дека во текот на овој месец ќе биде презентиран новиот концепт за привлекување странски инвеститори, којшто ќе обезбеди транспарентност и еднаков пристап за домашните и странските инвеститори, што ќе има позитивен импакт врз домашната економија. Анѓушев најави и мерки за субвенционирање нови бизниси, отворање работни места за високостручен кадар и воспоставување соработка меѓу домашните и странски инвеститори.
Ова е дел од агендата на новата Влада за подобрување на бизнис климата во земјата, преку мерки и измени на законската регулатива. Но, паралелно со овие мерки, владата донесе решенија и за зголемување на минималната плата од околу 9.000 на 12.000 денари, ослободување на граѓаните од давачките за РДТ и други мерки, кои ќе го подобрат социјалниот статус на домаќинствата.
ВМРО-ДПМНЕ, за тоа време, продолжува со спинови и обвинувања, до степен на заплашување на граѓаните дека, не само што нема нови инвестиции во Македонија, туку постоечките капацитети на странските инвеститори се во фаза на затворање и селење на своите бизниси надвор од Македонија.
„Владата на Заев во наследство добива шеесетина странски компании, со кои што Владата на ВМРО-ДПМНЕ беше во сериозни разговори и потенцијални 25.000 работни места. Наместо да го продолжат трендот на носење инвестиции, тие се откажуваат. Бркањето на инвеститорите и затворањето на погоните, ја намалува цената на пазарот на трудот, тоа ќе ги намали платите, а тоа значи и повеќе профит за бизнис олигарсите на СДС“, обвини Кристијан Делев на прес конференција.
Но, ВМРО-ДПМНЕ во своите обвинувања, заборави на бројните реакции на граѓаните – вработени во фирмите со странски капитал, кои што се жалат на тежок мобиг, на екстремна експлоатација за минимални пари, на откази (вработените од Гентерм, на обука во Украина) од една страна и на нереалната слика на (не)остварени вработувања со прикривање на податоците во Агенцијата за вработување и нивна поделба на активни и пасивни невработени.
Моника Талеска
