ВМРО-ДПМНЕ нагласува дека „постапката за репреговарање на охридскиот Рамковен договор, преку форма наречена Платформа, може да предизвика други етнички заедници да излезат со свои платформи… Со цел да не се донесе земјата во уште по сложена ситуација, а имајќи предвид дека повторното преговарање на Охридскиот договор е, всушност, отворање на Пандорина кутија, ВМРО-ДПМНЕ во разговорите со ДУИ одби да преговара за истата Платформа!“, се вели во денешното соопштение на ВМРО-ДПМНЕ.
Во соопштението се вели дека „СЈО треба да ја работи својата работа професионално, а не како марионета на СДСМ и други надворешни центри, и согласно договорот од јуни-јули 2015-та, без негово менување, вклучувајќи и без негово продолжување… Не е точно дека тоа беше причината за непостигнување на договор за коалицирање на ДУИ, иако очигледно е дека на ДУИ ѝ одговара така да ја претстави работата. Во реалноста, всушност, освен што на почетокот се констатира дека по ова прашање имаме различни позиции, над 95 осто од времето за разговори беше посветено на дебата околу барањето на ДУИ за измени на законот за употреба на јазиците, каде беа и главните разлики!“.
ВМРО-ДПМНЕ тврди дека биле изрично против воведување на двојазичност на целата територија, меѓутоа дека покажале интерес да се води дискусија околу одредени идеи за унапредувања на законот за употреба на јазиците во оние општини каде живеат етнички заедници различни од македонската, со застапеност од најмалку 20 проценти во рамките на општината.
„На фер и демократски избори, ВМРО-ДПМНЕ доби нов легитимитет кој никој не ги оспори, иако одредени надворешни центри им помагаа на одредени субјекти во годината пред изборите. Партијата освои најголем број на гласови и мандати и сега, имаме ситуација каде имаме обид тоа да се изгира, а тоа не е добро за државата, создава нови кризи, и сметаме дека е зрела ситуацијата за нови избори“, се наведува во соопштението.
ВМРО-ДПМНЕ потенцира дека ако за носење на измени на закон кој го засега малцинството е потребен т.н. Бадентер, или мнозинство од немнозинските заедници, тогаш и за измена на таков закон, потребна е и подршка од мнозинството на мнозинската зедница и мнозинство од Македонците во парламентот: „Како што не сакаат помалите етнички заедници да бидат изиграни и надгласани за еден ваков закон од мнозинската заедница – Македонската, исто така и мнозинската зедница на Македонци не сака и нема да дозволи да биде надгласана од коалиција составена од малцинството Македонци во парламентот со сите албански партии и пратеници во истиот“.
