По повод Денот на НАТО, 4 Aприл, денеска во Воениот музеј беше одржана трибината „НАТО и Ти“, организирана од Министерството за одбрана, во координација со АТА Македонија, НАТО – Канцеларијата за врски во Скопје и Амбасадата на Хрватска во Македонија.
На трибината учествуваа министерката за одбрана Радмила Шекеринска, министерот за финансии Драган Тевдовски, амбасадорот на САД, Џес Бејли, хрватската амбасадорка Данијела Баришиќ и шефот на Канцеларијата за врски на НАТО во Скопје, морнаричкиот капетан Горазд Бартол.
Воведни обраќања имаа и националниот координатор за НАТО, Стево Пендаровски, претседателот на АТА Македонија и советник за НАТО на премиерот, Исмет Рамадани, како и претседателот на светската АТА организација, професорот Фабрицио Лучиоли.
Меѓу вредностите на НАТО, Стево Пендаровски ја издвои слободата на медиумите која ја уживаат граѓаните во државите – членки на Алијансата.
„Државите кои се во НАТО со години важат за држави кои имаат најслободни медиуми. Таму добивате информација, таму не добивате пропаганда… Концептот на човекови слободи и права нам ни е особено важен. Индивидуалната одговорност е клучот на современиот свет за развој, ние мораме да ја усвоиме вистински таа вредност“ изјави Пендаровски. Тој додаде дека штом чекаме две децении да влеземе во НАТО, мора да имаме сериозни причини за тоа.
„Ние како мала држава го имаме тој синдром на безбедносен дефицит, не можеме самите со домашни, автономни сили да се одбраниме од каква било закана“, додаде Пендаровски.
Министерката за одбрана, Радмила Шекеринска, потсети дека Македонија сака и може да биде членка на НАТО, бидејќи се работи за еден од најуспешните сојузи во историјата на човештвото.
„Половина од светската моќ е НАТО, половина од воената моќ е исто така – НАТО. Воената моќ не значи дека Алијансата има капацитет за напад, но значи дека има моќ која што и гарантира колективна безбедност и колективна одбрана“, изјави Шекеринска.
Таа додаде дека тоа не се единствените причини поради кои Македонија сака да влезе во НАТО.
,Ако ги погледнете листите на земји со највисок квалитет на живот, ќе видите дека од првите 10, во секоја листа – 8 се членки на НАТО. Една е партнер на НАТО, а една опкружена со земји членки на НАТО. И тоа покажува зошто граѓаните дури и оние кои многу не се занимаваат со прашањата на одбрана, инстинктивно велат – да. На земја како Македонија со минато, со предизвици, со ризици кои што ги почувствува на сопствена кожа, НАТО и дава шанса плус, да развива економија релаксирана од безбедносни ризици“, додаде Шекеринска.
Американскиот амбасадор, Џес Бејли, изјави во споредба со минатото, најголемата разлика е дека Македонија може наскоро да влезе во НАТО.
„Што значи членството во НАТО за Македонија и нејзините граѓани? Тоа значи дека ќе бидете сојузници, а не партнери, соседи со останатите членки. Алијансата е сојуз што се заснова на почитување на човековите права и слободи, демократијата и владеењето на правото“, додаде Бејли.
Хрватската амбасадорка во Македонија, Данијела Баришиќ, изјави дека пред девет години кога Хрватска станала членка на НАТО, околностите биле поинакви од денес. Во тоа време, кога Хрватска го поминувала истото како и Македонија сега, тие имале политички консензус, и сите политичките партии сакале Хрватска да влезе во НАТО. „Политичката и економската стабилност се нешто по што првично беше оценувана Хрватска на патот кон НАТО, а не по модернизацијата на воените сили“, додаде Баришиќ. 
До 13 aприл ќе се одвива и „НАТО недела“, која опфаќа повеќе настани кои имаат за цел да дадат поинаква димензија на НАТО и стратешката определба за членство во Алијансата да се приближи до граѓаните.
„Во текот на неделата граѓаните ќе имаат можност подобро да се запознаат со концептот на организацијата. Клучната цел е високи претставници, одлучувачи, дипломати, претставници на вооружените сили и цивилен персонал вклучен во процесот на Евроатлантскиот процес на интеграции да стапат во непосреден контакт со граѓаните и да ги потенцираат конкретните придобивки на просечниот граѓанин и начинот на кој што нашето секојдневие ќе се промени со пристапување кон Алијансата“, стои во планот на организаторите.
Текст и фото: Ангела Петровска
