Целодневниот настан „Перспективи 2018“ започна во 9 часот наутро и ќе трае до 17 часот. Со првите гостувања на Александар Кржаловски, прв извршен директор на МЦМС и Латиф Мустафа, публицист, со колегиумот на Редакцијата ЦИВИЛ Медиа и состанокот на координативното тело на организацијата, започна уште еден динамичен, експериментален работен ден, отворен за медиумите и граѓан(к)ите. Во текот на целиот ден ќе се одржуваат брифинзи и состаноци на различни теми поврзани со проектот „Слободни медиуми за слободно општество“.
ЦИВИЛ ќе биде на располагање да одговара на прашања поврзани со проектите, извештаите и ставовите на организацијата, а кои се однесуваат на слободата на изразувањето и медиумските слободи, човековите права и слободи, социјалната правда, екологијата, младите, изборниот процес и демократската трансформација на општеството.
На настанот, ЦИВИЛ покани истакнати јавни личности, експерти и активисти со кои ќе одржи работни средби и ќе разговара за перспективите на Македонија во 2018 година. Претставниците на медиумите се поканети да се информираат и да земат изјави на сите теми кои се во делокругот на ЦИВИЛ. Како и секој друг ден, граѓанките и граѓаните кои сакаат да споделат информации или да посведочат за кршење на човековите права и слободи, можат да го сторат тоа во текот на целиот ден, овој пат во хотел Сити Парк, кој се наоѓа на паркингот кај Општина Центар.
Поканети се и претставниците на невладините организации со кои ЦИВИЛ има соработка и партнерства, но и оние што сакаат таква соработка и да се започне во 2018 година.
Во рамките на програмата, на истата локација (хотел Сити Парк) со почеток во 13 часот, ќе се одржи и церемонија за доделување награди за граѓанско новинарство во проектот „Граѓански објектив“.
На настанот ќе бидат достапни и копии од изданијата на ЦИВИЛ во печатена форма и ДВД. Заинтересираните граѓанки и граѓани ќе имаат можност да се запознаат со сите активности на организацијата и со можностите за ангажман во проектите.
Џ.Д.