Враќањето на опозицијата во Парламентот беше една од темите на кои лидерите на двете најголеми политички партии Зоран Заев од СДСМ и Христијан Мицкоски од ВМРО-ДПМНЕ разговараа на средба во Владата вчера вечерта.
– Во делот на враќањето во Парламентот од страна на ВМРО-ДПМНЕ ни ги соопштија ставовите околу притворите и јас имам апсолутно разбирање за тоа што и опозицијата го кажува дека не се враќаат додека не бидат комплетирани. Уште еднаш сакам да напомнам дека немаме намера апсолутно да вршиме притисок или влијание врз правосудството заради тоа што правосудството е независно и апсолутно важењето на законот е еднакво за сите и за јакнењето на правосудството ова е апсолутно е недозволиво, изјави премиерот и лидер на СДСМ Зоран Заев по средбата со Мицкоски.
Додаде дека како политичка партии секако се дека притворите не смеат да бидат казна и апсолутно треба да се минимализираат во државата, но, како што рече, тоа е обврска и право на јавното обвинителство и судовите во РМ.
Истакнувајќи дека уште утре би сакал опозицијата да се врати во Парламентот уште еднаш апелираше да се вратат во законодавниот дом.
Премиерот истакна дека во однос на законот за употреба на јазиците се далеку од приближување на позициите.
– Предлогот да се формира работна група која со уставни експерти би ги толкувале уставностите на самиот закон апсолутно е неприфатливо. Прво од принципиелни и прагматични причини, а тоа е дека постои Уставен суд во РМ и ако нешто е неуставно тоа треба да го каже Уставниот суд. Парламентот ги гласа законите, претседателот го употреби своето право на вето и го врати законот. И навистина ова законско решение е неовозможено право на помалку бројните заедници треба да се овозможи, а потоа постои Уставниот суд ако навистина тврдат дека е неуставен. За нас законот е уставен и апсолутно не треба да го доведеме Парламентот во ситуација да ги толкува уставноста или неуставностите, истакна Заев.
Потенцира дека поднесените 35 илјади амандмани ќе го блокираат Собранието кое во најмала рака ќе остане блокирано до завршување на Самитот на НАТО во јули.
– Апсолутно тоа не е одржливо. Сме демократи луѓе. Сакаме да разговараме со сите засегнати страни, но за жал се уште немаме решение на овој проблем. Ако се тргне на амандманска расправа би требало најмалку шест месеци за да се дискутира по амандманите. Овие амандмани се поднесени заради неуставноста на законот. Парламентот дефинитивно не е толкувач дали е уставен или не законот. Тоа е Уставниот суд и ако се има малку разум ќе се даде можност законот по пат на разговори со опозицијата да помине. Јас сум убеден дека Уставниот суд на крајот ќе каже дали нешто е уставно или не. И во тој дел за жал немаме некој разумни решенија помеѓу владејачкото мнозинство и опозицијата, изјави Заев.
Се надева дека во наредните денови ќе се искористи секоја можност во Парламент во работни групи да се најде решение.
– Едно знам дека не треба да дозволиме Македонија да биде блокирана во наредните шест месеци, кои се исклучително значајни за интеграцискиот процес посебно за пораката што ја испраќаме кон инвеститорите и мора да водиме грижа, но мора да водиме грижа и за демократијата. Може да одлучиме да го пуштиме процесот со сите амандмани и тогаш сите ќе знаат дека ВМРО-ДПМНЕ е виновно за блокирање на процесите, рече Заев.
На средбата премиерот го информирал Мицкоски и за разговорите за името со Грција, каде како што рече, немаме некое поместување.
– Од средбата во Виена нема некое поместување. Апсолутно разговаравме за нашите стратегии и детали. Го информиравме како шеф на најголемата опозициската партија за намерите како да течат преговарачките процеси. Секако тие остануваат на нивните познати ставови и ние остануваме на нашите ставови и остануваме оптимисти дека може да се најде решение за овој горлив проблем кој постои повеќе од 25 години, но притоа секако тоа да биде со сочувување на достоинството и идентитетот од двете страни во преговорите за името, рече Заев.
Повтори дека следува нова рунда преговори која ќе биде крајот на март или почеток на април под раководство на Нимиц. Дотогаш ќе има билатерална средба меѓу двајцата министри.
– Имаме најава дека Коѕијас ќе долета третата или четвртата недела од март, каде буквално со неговото доаѓање на аеродромот Скопје ќе може да направат обиди да некако ги приближат ставови, меѓусебно да се информираат, да споделат очекувања или слично, а преговарачкиот процес ќе продолжи под раководство на медијаторот Нимиц, рече Заев посочувајќи дека немаат добиено драфт верзија и оти ја очекуваат првата да дојде со Коѕијас.
Се надева дека по ова прашање дека може да изградат национален консензус.
Според него прашањето е како да се најде решение на отворените прашања и оти тоа го прават. – Не боли сите неправичноста, наметнатоста на овој ирационален проблем сите подеднакво. Можно е сите да се позиционираме и процесите повеќе да не течат, да не се преговара, прашањето е дали може да најдеме решение кое ќе го сочува нашето достоинство и нашиот идентитет, рече премиерот.
Станало збор на средбата, како што рече Заев и за законот за финансирање на политичките партии, нешто што треба да доведе до поголема независност на политичките партии од какви било донации, бизнисмени и слично, со цел, како што истакна, да ги направиме потранспарентни, а секако и потенцијално некорумпирани во иднина.
извор: МИА
Содржините кои ЦИВИЛ ги презема од други извори не подлежат на лиценцата Creative Commons 1.0, инаку вообичаена за содржините кои ги објавува оваа медиумска платформа. Ве молиме, консултирајте се со изворот за преземање на таквите содржини.
