Украинскиот претседател Володимир Зеленски изјави дека руските напаѓачи не го контролираат Бахмут во регионот на Доњецк, но ситуацијата таму е многу комплицирана долж линијата на фронтот.
Зеленски ова го изјави на заедничката прес-конференција со полскиот претседател Анджеј Дуда во Варшава, одговарајќи на прашање на дописникот на Укринформ.
„Ние сме во Бахмут и непријателот не го контролира Бахмут. Ова е ситуацијата за денес“, рече Зеленски.
Тој подвлече дека најкомплицирана ситуација низ Украина во моментов е во Бахмут, каде што се користи најголем број оружје, вклучително и артилерија.
Зеленски напомена дека за оперативната ситуација во градот раководи генералот Олександр Сирскиј и, според него, главната цел на генералот е да го задржи персоналот.
„Најважно ми е да не ја загубиме војската, а доколку дојде до момент на уште пожешки настани и ако може да изгубиме персонал поради опкружување, генералот сигурно ќе донесе соодветни одлуки на лице место“, додаде Зеленски.
Во исто време, претседателот нагласи дека колку побрзо Украина добие оружје од партнерите, толку побрзо украинските војници ќе можат да возвратат не само во Бахмут, туку и на други места.
Според Серхи Черевати, портпарол на Источната група на вооружените сили на Украина, во областа Бахмут, одбранбените сили на Украина елиминираа 88 напаѓачи, повредија уште 124 и уништија непријателски беспилотни летала, станица за електронско војување и складиште за муниција.
„Во текот на денешниот ден во правецот Бахмут се забележани 245 напади со различни артилериски системи и 21 борбен судир. Загинаа 88 окупатори, уште 124 се повредени. Покрај тоа, три непријателски беспилотни летала, станица за електронско војување и складиште за муниција беа уништени“, рече Черевати.
Според него, тешки битки се во тек кај Бахмут; непријателот продолжува со нападот. Черевати нагласи дека непријателот ги фокусира главните напори во областите Бахмут и Купијанск-Лиман.
Подготви: Д. Мишев