ВЕСТ НА ДЕНОТ
Американскиот Стејт Департмент го означи македонскиот бизнисмен и поранешен вицепремиер на Република Северна Македонија, Кочо Анѓушев, за неподобен за влез во САД. Во соопштението се наведува дека ознаката е поради вмешаност во значителна корупција, односно злоупотреба на службената должност додека беше вицепремиер, во корист на приватни деловни интереси.
Покрај Анѓушев, САД ги означија и членовите на неговото потесно семејство сопругата Елизабета и децата, Ангел и Огнен, како генерално неподобни за влез во Соединетите држави. Денешната акција ја потврдува посветеноста на САД, дека стојат со оние во Северна Македонија кои бараат одговорност од корумпирани јавни функционери, се наведува во соопштението.
ИЗЈАВА НА ДЕНОТ
„Денешното означување на поранешниот вицепремиер за економски прашања Кочо Анѓушев и неговото семејство е уште еден доказ дека Соединетите Држави ќе продолжат да ги санкционираат корумпираните актери во оваа земја и во регионот, без разлика на нивната позиција, политичка определба или времето на злоупотребите. Ќе следуваат повеќе назначувања, но факт е дека нашите напори и нашите санкции не можат да ја поправат епидемијата на корупција во Северна Македонија. На крајот на краиштата, останува на функционерите и граѓаните на оваа земја да побараат одговорност и промени.“ се наведува во соопштението од Амбасадорката на САД, Анџела П. Агелер.
ВОЈНА ВО УКРАИНА
Заклучно со 5 декември 2023 вкупно 512 деца се убиени, а над 1.152 се повредени во Украина од почетокот на руската инвазија, соопштија од Украинското државно обвинителство.
*
Европската комисија добива предупредувања да не се обидува „да го смири“ унгарскиот премиер Виктор Орбан, „одмрзнувајќи“ милијарди евра наменети за Будимпешта, откако тој се закани дека ќе ги блокира плановите на ЕУ за отворање пристапните преговори со Украина и за нова парична помош за Кијив.
КОНФЛИКТИ
Според Министерството за здравство на територијата контролирано од Хамас, во болницата Камал Адван во северниот дел на Газа лежат 108 мртви тела, а некои не се побарани. Израелските трупи напредуваат кон објектот, со силни истрели и експлозии околу неговата близина во последните 24 часа. Новинарот кој се нашол во болницата, Махмуд Ал-Сабах, во вторникот испрати видео на Си-Ен-Ен од околу 30 тела покриени со бели чаршафи во дворот.
*
Со оглед на војната меѓу Израел и Хамас и поларизацијата што таа ја предизвикува во нашето општество, како што се приближува празничната сезона, постои огромен ризик од терористички напади во Европската унија“, нагласи еврокомесарката за внатрешни работи Илва Јохансон.
ФЛЕШ ВЕСТИ
ОЈО Во обвинителството заврши распитот на таткото на 14-годишната Вања Ѓорчевска во врска со нејзиното убиство за кое тој е осомничен дека споделувал информации со останатите осомничени за нејзиното излегување од дома. Од ОЈО Скопје велат дека во основа тој ги негира дејствијата.
ШПЕКУЛАЦИИ МВР најостро ги демантира шпекулациите кои денеска се проширија по одредени портали, локални телевизиски станици и социјалните мрежи за наводен спречен обид за грабнување на малолетно лице во училишен двор на ОУ „Страшо Пинџур“, во општина Карбинци.
КОП 28 Министерката за животна средина и просторно планирање, Каја Шукова, во рамки на COP28, учествуваше на панел дискусијата на високо ниво фокусирана на искуствата на четири земји-членки на ОН за користење на средствата од Заедничкиот фонд за Целите за одржлив развој на ОН со чија помош во овие држави се реализираат програми насочени кон одржливиот развој.
АЛ-ПРЕС
Редакциски избор од албански медиуми: Во Приштина сенароден протест за безбедноста на жените; нема консензус за Заедницата; почина големиот албански уметник Мируш Кабаши.
ДЕЗИНФОРМАЦИИ
„Многу дезинформации, лажни вести, шпекулации, полувистини, теории на заговор се проширија за исчезнувањето и убиството на 14-годишната Вања Ѓорчевска. Покрај дезинформациите, одредени лица се обидоа од оваа трагедија да продуцираат етнички тензии во општеството и да добијат политички поени. Министерот за внатрешни работи Оливер Спасовски ги негираше информациите пласирани во јавноста, првично од сопственикот на порталот Дудинка, Миленко Неделковски, кој доцна синоќа изнесе низа (дез)информации за убиството на малолетното девојче, односно дека полицијата знаела, а не откривала детали за исчезнувањето на Вања, поради Самитот на ОБСЕ, се вели во извештајот на ЦИВИЛ Мониторинг тимот „Лавина дезинформации и обиди за политичка злоупотреба на случајот со монструозното убиство на 14-годишното девојче“
Подготви: Б. Јордановска