ВЕСТ НА ДЕНОТ
Шефицата на дипломатијата на Романија Луминица Одобеску денеска престојува во работна посета на Северна Македонија, на покана на министерот за надворешни работи Бујар Османи.
„Романија била и е поддржувач на пристапувањето на Северна Македонија кон ЕУ. Со оглед на стратешката важност на европската интеграција за иднината на вашата земја, Романија верува дека само преку заедничка заложба и силен национален консензус за потребните реформи, Северна Македонија што поскоро ќе ги донесе потребните одлуки и ќе го забрза патот кон ЕУ, изјави министерката за надворешни работи на Романија, Луминица Одобеску на заедничката прес-конференција со министерот за надворешни работи Бујар Османи.
ИЗЈАВА НА ДЕНОТ
„По однос на изборите реков, ова не е прашање што кој било треба да го наметне на друг. Ако има едно прашање на кое што сите треба да бидат задоволни тоа се изборите. Бидејќи изборите бараат рамен терен за натпревар. Не може да фаворизирате која било страна. Затоа кај нас има т.н. Пржинска влада во која што влегува опозицијата со двајца министри, тројца заменици-министри, поднесува оставка актуелниот премиер за да се овозможи рамен терен за избори. И датум за избори мислам дека е дел од тој рамен терен. Ние ќе се обидеме неоптоварени да аргументираме која варијанта е подобра. Јас реков и вчера ако зборувам како ДУИ внатрешните анкети ни покажуваат дека во која било варијанта ние сме убедливи победници во албанскиот политички блок, така што тоа нема да ни влијае нам како партија“, изјави министерот за надворешни работи, Бујар Османи.
ВОЈНА ВО УКРАИНА
Министерот за надворешни работи Дмитро Кулеба во објава на Икс наведе седум примери како Русија ги прекршила меѓународните договори постигнати како резултат на преговорите во претходните 30 години
*
Командантите на руската армија, најверојатно, ги казнуваат злоупотребувачите на дрога и алкохол, испраќајќи ги во јуришните одреди „Сторм-З“, соопшти Министерството за одбрана на Обединетото Кралство во ажурираните податови од разузнавањето на социјалната платформа Икс.
ФЛЕШ ВЕСТИ
ОДЛУКА За сите вработени во државната и јавната администрација на подрачјето на Град Скопје, 30 ноември (четврток) ќе биде неработен ден поради одржувањето на 30. Министерски состанок на ОБСЕ. Работното време на 29 ноември 2023 (среда), пак, ќе заврши во 12 часот. Одлуката ја донесе Владата денеска на седница, на предлог на Министерството за надворешни работи.
СООБРАЌАЈ Министерот за транспорт и врски, Благој Бочварски, денеска го потпиша договорот за имплементација на Системот за брз автобуски превоз (БРТ) во Скопје, во соработка помеѓу Министерството за транспорт и врски, Министерството за финансии и Градот Скопје, информираат од Министерството за транспорт и врски.
ЦИВИЛНИ АКТИВНОСТИ
ЦИВИЛ во соработка со Општина Чаир организира мултимедијален настан „Заедно за подобра иднина“, утре, со почеток во 12 часот, во Општината.
Како завршна фаза од повеќе активности спроведени во неколку општини, вклучително и Општина Чаир, на настанот ќе се доделат награди на ученици и ученички од 8 училишта во Чаир, за нивните ликовни творби што беа дел од конкурсот на тема мултикултурализам, еднаквост и недискриминација. Присутните ќе имаат можност и да ја видат изложбата од сите цртежи со кои учествуваа на конкурсот за ликовни творби повеќе од 25 ученички и ученици.
ИНТЕРВЈУ
КОНФЛИКТИ
Израелската војска рано утринава соопшти дека нејзините војници ја напаѓаат болницата Ал-Шифа во Газа, комплекс згради каде што илјадници луѓе се засолниле, а условите за пациентите стануваат сè помрачни како што залихите се намалуваат. Борбите се водат во близина со денови, а болницата беше погодена најмалку четири пати во текот на викендот.
ДЕЗИНФОРМАЦИИ
„Министерката за одбрана Славјанка Петровска е повторно мета на говор на омраза и навреди на социјалните мрежи. Нова серија од крајно навредливи, недолични, дегутантни и мизогини коментари „изникна“ на социјалните мрежи по фото и видеомонтажата во која се гледа како наводно претседателот на СДММ, Марко Михаилоски, танцува со министерката за одбрана Петровска, по повод 32 години постоење на младината на социјалдемократите. Додека пак на фотомонтажата и залепиле емотикон „Барби“, се вели во извештајонт на Минторинг тимот на ЦИВИЛ „Лажно фото и монтирано видео предизвика говор на омраза кон министерката Петровска“
Подготви: Б. Јордановска