„Основното јавно обвинителство – Скопје ја известува јавноста дека во врска со изборни нерегуларности има отворено постапка уште во 2016 година. Основното јавно обвинителство – Скопје во работењето постапува неселективно и неповрзано со преземени дејствија на други органи, ја води постапката без да објави податоци за нејзиниот тек, за да не ја повреди тајноста што е обезбедена со закон“, се вели во соопштението кое денеска го објави Основното јавно обвинителство.
„Постапувајќи по кривична пријава поднесена од надлежна институција, Основното јавно обвинителство – Скопје минатата година оформи предмет против едно лице – организатор на изборна кампања и други лица, како и против едно правно лице за сторено кривично дело – Злоупотреба на средства за финансирање на изборна кампања од член 165-а од Кривичниот законик… Делата за кои е отворена постапката се во врска со употреба на недозволиви средства за изборна кампања и давање на лажни податоци во финансиските извештаи. Во рамките на постапката досега се преземени претходни дејствија, побарана и прибрана е материјална документација, релевантни писмени докази, а во просториите на Основното јавно обвинителство – Скопје се сослушани повеќе од 70 лица сведоци“, стои во соопштението.
Соопштението, како што велат од ОЈО, доаѓа по објавените натписи во врска со истрагите на кои деновиве работат. Имено, дел од медиумите, објавија дека ОЈО повикало на распит повеќе партиски функционери на СДСМ, како сведоци во предмет во кој се истражуваат донации уплатени на сметка на партијата на последните избори.
На ова му претходеше истрага на Специјалното јавно обвинителство, во која околу 200 функционери и членови на ВМРО-ДПМНЕ од Охрид беа повикани на информативен разговор. Според медиумите, се работи за истрага за финансирање на изборите во 2014 година.
Оваа истрага предизвика револт кај членови и симпатизери на ВМРО-ДПМНЕ кои во четвртокот два часа протестираа пред објектот на охридската полиција.
