На огласот за државен јавен обвинител, чиј рок изминува денеска, се јавиле 23 кандидати. За највисоката функција во Обвинителството се пријавиле адвокати, поранешни и актуелни судии,обвинители. Од позвучните адвокатски имиња според порталот „Судство“ се пријавиле: Ѕвонко Давидовиќ, Александар Тортевски, Еленко Миланов, Тони Менковски, Арбен Гоља, Кирил Смичковски, потоа, поранешниот судија Валентин Зафировски, поранешниот обвинител Александар Наков, судијата д-р Лазар Нанев …
Од редот на обвинителската фела, кандидатура поднел и членот на Советот на јавни обвинители и заменик во Републичкото јавно обвинителство, Љупчо Јовевски, како и обвинителката од организиран криминал, Лидија Раиќевиќ. На листата на пријавени се и нотарката Лорија Ваневска, Сефула Османи, Крсте Крајовски и други.
Во рок од 15 дена, по завршување на рокот за пријавувањето на кандидатите, Советот на јавните обвинители по барање на Владата, доставува образложено мислење во писмена форма, за сите кандидати, што ги исполнуваат условите.
Мислењето на Советот е обврзувачко за Владата. Предложените кандидати Владата ги доставува до Собранието. Ако Советот не даде мислење во рок од 15 дена, следуваат дополнителни 15 дена за мислење. Ако и по истекот на тие 15 дена, нема писмено известување, се смета дека мислењето е позитивно. Доколку Советот не даде позитивно мислење за ниту еден од пријавените кандидати, Владата не може да утврди предлог за именување јавен обвинител и може да му предложи на Собранието да го повтори огласот.
Мандатот на државниот јавен обвинител е шест години, со право на повторен избор.
