Продолжува мантрата на прес центарот на ВМРО-ДПМНЕ во очајничките обиди да се оправдаат злосторничките акти на напаѓачите на Собранието на 27 април годинава. Прес центарот во континуитет се обидува да го дискредитира СДСМ и ги велича напаѓачите, но денеска со нешто поблаг тон, веројатно како резултат на вчерашниот текст на ЦИВИЛ Медиа. ВМРО-ДПМНЕ го прикажува судството во светлина во каква што го остави – дека е под политички диктат. Па, така, во денешното соопштение се вели дека „правосудството е под јаремот на СДСМ“.
Десетици учесници во настаните од 27-ми април, уметници и пратеници неосновано се ставени во притвор. додека премиерот е целосно недопирлив за правосудните органи. Притисокот не запира кај органите за прогон и пресудување, туку продолжува и во установите за притвор. Притворените се изложени на нехуман однос, престојуваат во ќелии со температури под нулата, полни со мувла и со неисправни прозорци во сред декември.
ВМРО-ДПМНЕ „заборава“ дека тоа се затворите кои тие ѝ ги оставија во наследство на Македонија и дека на температури под нулата беа десетици политички затвореници на режимот на Груевски.
Понатаму, во соопштението се вели: „Презумпцијата на невиност овде е непознат поим. Правата на луѓето во истрага неоткриена категорија.“ Овој став како да е „позајмен“ од извештаите на организациите за човекови права, меѓу кои и оние на ЦИВИЛ во изминатата деценија. Таков е и ставот: „Прогонот кој се врши е невиден за демократска Европа. Човековите права гаранитрани со Европската конвенција за човековите права се кршат на секој чекор. СДСМ ги зароби институциите. На удар е секој еден граѓанин. Овој прогон мора да запре. Македонија мора да стане демократска држава, со цврсто загарантиран принцип на владеење на правото.“
Како и да е, во прашање се нијанси во вокабуларот, но сеедно со јасна порака: и по Груевски, останува Груевски, наспроти смената на врвот на „демократските“ внатрепартиски избори кои се одржаа за време на вонредниот конгрес на оваа партија во Валандово на 22-23 декември. Да се потсетиме, единствениот кандидат за нов лидер беше послушникот на Груевски, Христијан Мицковски. Очигледно, Мицковски ја лажеше јавноста кога стапи на функцијата и повика на политичко помирување и вети дека партијата ќе биде конструктивна.
Џабир Дерала
